KellyChu - 為不同節目度身打造行程吸客旅發局聯繫全球綜藝支援拍攝暢遊香港 | Executive日記

專欄

更新時間：02:00 2025-05-27 HKT
發佈時間：02:00 2025-05-27 HKT

小妹平時去旅行前都習慣上網睇下節目介紹有咩好玩好食，希望做好攻略規劃行程，最後盡興而歸。旅發局亦掌握趨勢，一直與世界各地嘅知名電視台和媒體合作，製作不同類型節目宣傳香港，並為來港取景嘅電視節目及電影提供協助。

　　旅發局指，佢哋會根據不同節目特色，度身打造拍攝行程及特色內容建議。近月播放嘅人氣綜藝節目中，獲旅發局全力支持嘅便有：南韓《玩甚麼好呢？》、《超人回來了》、《大富翁世界旅行》；台灣《全明星出發吧！》；澳洲《Racing Dream》、《我要做廚神澳洲篇》；英國《Jeremy Pang's Hong Kong Kitchen》。

　　南韓綜藝節目《玩甚麼好呢？》3月曾有一集以「地鐵遺失物品篇」為題，測試路人會否拾金不昧。當時一對香港情侶拾獲銀包後立即交回失物認領處，更將節目組送嘅禮物轉送給有需要人士，成為亮點。此事亦啟發節目組來港拍攝，並獲旅發局提供拍攝支持，其中一集眾主持在中環PMQ展開旅程，為呢對香港情侶精心挑選禮物，沿途感受香港獨有文化氣息，之後去到油麻地一間中菜館與小情侶重逢，場面歡樂。

　　英國美食旅遊節目《Jeremy Pang's Hong Kong Kitchen》更係由國際知名廚師Jeremy Pang主持，佢一連6集與不同嘉賓探索香港飲食文化，內容不僅展示咗香港嘅街頭美食、傳統茶館及米芝蓮餐廳，仲透過與本地廚師及食材供應商交流，揭示美食背後嘅動人故事。

KellyChu