KellyChu - 春光和煦百花開黃花風鈴木吸睛石崗軍營木棉花紅海盛放 | Executive日記

專欄

更新時間：02:00 2025-03-05 HKT
發佈時間：02:00 2025-03-05 HKT

春天百花齊開，市面煥然一新，令人都心花怒放。小妹最近從友人口中得悉，位於元朗八鄉石崗軍營嘅木棉樹已漸漸開花，石崗軍營有逾20棵木棉，每年3月盛放都會染成一片火紅花海，非常美麗，有「港版木棉夾道」之稱，想賞花嘅朋友記得把握花期前往打卡喇。

　　木棉樹喺香港多區街道或公園都可以搵到佢嘅蹤影，每年3至4月花兒綻放都會吸引途人駐足欣賞，滿樹紅花就似為城市添上喜悅之情。而講到木棉花最佳觀賞地點就不得不提石崗軍營，該處有一條逾50米長嘅夾道，兩排種有各10棵參天木棉，加上旁邊嘅大草地，彷彿置身世外桃源，美不勝收。

　　近日進入花期嘅仲有黃花風鈴木，Kelly喺市區多處公園都能看見鮮艷嘅黃花掛滿枝頭，非常吸睛。位於機場嘅黃花風鈴徑便有超過200棵正在綻放，現場一片黃色花海，相當壯觀。拎起相機映襯蔚藍天空，更是美麗，感恩大自然餽贈。

　　靠近市區嘅南昌公園也有150棵黃花風鈴木，同樣陸續盛放當中。黃花風鈴木嘅花語係「再回來的幸福」，由於開花期短約維持一至兩星期，要感受呢份幸福便要趁早喇。

KellyChu