古星輝 - 5G結合衛星打造無縫覆蓋 | 乜都5G

專欄

更新時間：02:00 2024-05-24
發佈時間：02:00 2024-05-24

近日電訊界出現一個新名詞「衛星通訊」，皆因本地電訊商即將推出有關服務，其實全球不少持份者正在部署如何令衛星通訊應用普及，甚至將現有通訊網絡直連衛星。早前，業界組織3GPP喺第17版文件中，開始提及衛星通訊於5G網絡嘅角色，長遠來說，5G同衛星會係覆蓋互補嘅角色，而並非互相競爭，民用普及化指日可待。

　　衛星通訊並唔係新事物，早於1999年已經出現首部衛星電話，不過呢種電話價錢相當昂貴，機身體積大，天線亦相當粗壯，並不是大眾玩意，至2022年全球約有40萬名用戶使用。

　　智能電話生產商經常要為產品注入新元素，廠商開始構思將衛星通訊技術加到智能電話，希望掀起換機熱。當中蘋果注資衛星公司，前年開始喺iPhone加入衛星功能，為全球14個國家嘅用戶透過衛星提供應急通訊功能。

星鏈衛星一般電話已可用

　　至於馬斯克旗下的SpaceX，本年初宣布以六枚星鏈（Starlink）低軌衛星，結合美國網絡商嘅流動網絡使用，原理好似係將流動通訊發射站放上太空，呢款手機直連衛星服務特色係一般智能電話已經可以用到。SpaceX預期今年底會先推出短訊服務，至於通話及數據服務就要到明年先至有，最近網絡上有一條透過星鏈打視像電話嘅短片，表現相當理想。夥伴方面，暫時已公布嘅有來自美國、澳洲、日本及瑞士等地嘅8個網絡商。

「天通一號」門檻親民

　　內地電訊商去年推出「天通一號」手機直連衛星服務，呢個高軌衛星只需一粒衛星，已經覆蓋好多國家地區。配合支援嘅智能電話已可使用，入門門檻唔算太高。呢個服務好快就會喺香港推出，屆時只要以支援型號電話，配合相應嘅網絡商，喺郊外平日覆蓋較弱嘅位置，就可以透過衛星服務收發電話及短訊。

古星輝