胡慧沖 - 何日再相逢 | 筆泰沖動

專欄

更新時間：02:00 2024-04-05
發佈時間：02:00 2024-04-05

　　剛剛回香港工作幾日，主要係為出席4月6日荔枝角舉行嘅潑水節活動，此外更加有個重要約會，就係4月1日晚上去咗睇許冠傑演唱會！

　　對於我來講，許冠傑絕對係一個神，一個歌神！我經常同大家講而家信咗神，神話畀我哋聽「命裏有時終須有，命裏無時莫強求。」呢個係咩神？咪係歌神囉！表面上係一個「爛Gag」，但其實字裏行間笑中有淚。今次睇許冠傑演唱會令我畢生難忘，畢竟我只係一個電視台旅遊節目主持，唔係大明星亦唔係超級紅人，但多謝阿Sam垂青，今次演唱會除咗可以畀我入去後台，讓胡慧沖參見「令狐沖」搵佢影相簽名之外，演唱會上更加喺同樂迷合唱時候畀支咪我，讓我同佢合唱咗一段《沉默是金》。但更加重要嘅係，因為之前喺鄭丹瑞《健康旦》節目中做過訪問，要求阿Sam唱一首我好鍾意，亦較為冷門嘅《何日再相逢》，估唔到今次佢真係找數，仲專登喺我面前唱呢首歌！更加估唔到原來大會安排咗攝影機影住我大頭喺螢幕上播放，小弟因感情豐富，聽到此曲頓時流淚，當眾喊爆，真係樣衰！冇諗過喺紅館眾目睽睽之下竟然如此失禮，但呢啲感動同埋淚水都係發自內心，從來無法想像一個由細到大咁仰慕、咁喜歡嘅歌神，一個偶像會對自己咁好，可以喺面前獻唱兼指定唱呢首歌畀我，實在太開心！當晚唔單止係與神接觸，直頭好似被神召喚！許冠傑嘅歌曲陪伴大家多年，除教曉我哋做人道理之外，亦都予人感覺超級親民。

　　問到何日再相逢？希望明年、後年佢都繼續開演唱會，咁我就可以繼續支持，繼續相逢。這位歌神，這個晚上，畢生難忘！

胡慧沖