MV點擊勁過MIRROR 處女歌賺6位數薛影儀獲百萬力捧Feel到自己紅咗

頭條日報-娛樂

更新時間：00:00 2023-05-16 HKT
發佈時間：00:00 2023-05-16 HKT

「亞視一姐」薛影儀於4月5日推出處女單曲《一加一等於阿儀》，MV的點擊已達156萬次，勁過只得132萬點擊的MIRROR處男英文歌《RUMOURS》MV，成績相當驚人，經理人公司AMM乘勝追擊預告為阿儀加推講父親的國語歌。「最索經理人」林寶玉指阿儀獲唔少大馬商演招手，有價有市，能為公司AMM帶來6位數字進帳，公司決定用百萬力捧她。採訪：方騫平
場地：Fleur@將軍澳

處女作點擊突破100萬後，阿儀扮貝兒公主入主題樂園慶功，勁受歡迎的阿儀一改平日迴避作風，就算不斷被集郵都來者不拒。而本報記者訪問當天，途人都認得阿儀及識佢嘅歌。
唱出被欺凌心聲

阿儀直言感受到自己紅咗：「開心嘅，之前都預計到有呢個成績，其實唱歌唔難，未來都想多啲唱歌及跳舞。」林寶玉指阿儀的處女歌為公司勁賺6位數，故下月父親節時會再出新歌，今年共出3首歌。不過，阿儀就唔多想唱情歌，亦冇諗過要拍拖。歌曲監製及MV導演李永升（怪獸哥）指《一加一等於阿儀》旋律既簡單，歌詞又帶出正能量，當中「無止境的喧嘩，浪費精神費事理」係唱出阿儀被欺凌的心聲。阿儀嬲豬說：「見人哋喺網上亂講嘢，我會忍唔住爆粗，有啲人真係好煩㗎，之前做完運動，喺更衣室俾人追住狂影，連老闆都話下次唔歡迎佢嚟。」

另外，林寶玉指其實阿儀經已由清咗盤嘅亞視控股子公司亞視數碼媒體，過檔到亞視控股另一間子公司AMM（亞洲心動娛樂），最近公司跟她續約獲加薪25%，未來更會集中火力，斥資過百萬力捧阿儀，對此，阿儀自言唔會有壓力，仲會留起薪酬做家用。