KellyChu - 貫通新界東西遊白樓青山公路建單車橋歎住海景去踩車｜Executive日記

頭條日報-專欄

更新時間：00:00 2022-10-17 HKT
發佈時間：00:00 2022-10-17 HKT

Kelly鍾意踩單車，好開心知道未來會有臨海嘅單車橋，可以一邊踏一邊享受海風。發展局計劃喺青山公路建設臨海單車橋同隧道，踩單車可以遊覽沿途海景同特色景點，包括獲評為三級歷史建築嘅白樓。

發展局局長甯漢豪話，政府一直致力建設一個貫通新界東西嘅單車徑網絡，成個網絡全長八十二公里！當中長約十七公里嘅荃灣灣景花園至掃管笏段單車徑尚待建造，土木工程拓展署提出咗深井新海濱長廊嘅構思，以填海方式擴闊嗰區嘅活動空間。甯漢豪引述土拓署工程師話，呢一段單車徑嘅環境限制比較複雜，工程難度比新界其他單車徑路段高，例如沿途青山公路兩旁嘅可用空間有限，又有陡峭嘅斜坡，所以部分單車徑會以臨海單車橋、隧道或護土牆方式建造。完工後，單車徑沿途景點之間往來會更加暢達。Kelly真係好期待到時去踩單車同遊覽景點！
Kelly Chu