出書助家長解決子女成長難題麥明詩母親爆囡囡考女拔怕醜事跡

頭條日報-娛樂

更新時間：00:00 2022-07-22
發佈時間：00:00 2022-07-22

「十優港姐」麥明詩一屋叻人，哥哥麥明山是專科醫生；爸爸是退休中學校長；媽媽麥何小娟從事兒童發展及治療超過35年。今年書展，麥媽媽再次出書《輕輕鬆鬆不做虎媽》，畀貼士家長如何解決子女成長遇到嘅難題，她回想起麥明詩當年面試女拔小學時，經已好有主見，仲大膽請校長食「檸檬」。
採訪：方騫平攝影：沈健程

5年前，麥明詩媽媽麥何小娟出過著作《我的女兒麥明詩一張白紙到10優的培育經歷》，分享培育子女心得，處女作獲得香港金閱獎。對於新著作，麥何小娟形容好似武林秘笈，會提及子女一言九「頂」、過度活躍、拖延症等令家長迷茫嘅問題，她強調教好一個細路仔，唔係要瘋狂去催谷佢哋入到名校，甚至精英班就係勝利組，咁樣就會跌進虎媽陷阱，小朋友喺高壓方式下好易出事，應該從小觀察小朋友性格，針對佢哋缺點嚟培訓，然後發掘佢哋嘅潛能。
麥明詩曾經好冇自信

麥何小娟舉例說：「麥明詩細個比較文靜，因為佢細過哥哥3歲，加上哥哥一直係焦點人物，佢成日覺得唔夠哥哥叻，有段時間冇乜自信，就算佢可以跟哥哥升埋同一間小學，我都刻意分開佢哋，唔想麥明詩喺哥哥陰影下長大，冇比較就冇傷害，仲會訓練佢溝通能力。」她好記得當年女拔就算報課外活動都好有競爭，「但我一啲都唔擔心佢，由得佢報校外喜歡嘅唱歌跳舞課程。」麥明詩目前搵到自己追求嘅嘢，麥媽媽坦言放心晒。

提到麥明詩當年面試女拔小學，麥何小娟表示，「因為家長不能在場，事後麥明詩只簡述，話面試時校長要求佢唱歌，但佢回答：『我唔想唱喎！』佢冇解釋點解唔唱，只係話自己唔想唱。」麥媽媽估計阿女係因為怕醜。