靠台慶51萬現金巨獎榮升業主黃庭鋒未敢做黃宗澤接班人

頭條日報-娛樂

更新時間：00:00 2022-01-17 HKT
發佈時間：00:00 2022-01-17 HKT

今年黃庭鋒憑劇集《把關者們》演殉職消防員打入今年台慶頒獎禮「男飛躍」6強行列，雖然第三度落敗該獎項，但他一啲都冇失望，形容入到圍經已好驚喜，反而TVB台慶帶畀佢好多嘢，尤其喺4年前抽中51萬現金巨獎，他就再補貼首期，買咗天水圍一所屋苑樓花，今年元旦日收樓。採訪：方騫平攝影：沈健程

黃庭鋒賽前都睇好羅天宇、丁子朗係「男飛躍」得主，果然冇跌眼鏡。對於再度失落「男飛躍」獎，問到可會感到失望時？他就大方說：「唔緊要喇！我會繼續努力，攞唔到『男飛躍』絕對係意料之內嘅事，其餘嘅對手都非常之出色。」
搬入新屋獨居

33歲嘅黃庭鋒日前正式榮升為業主，他相當興奮：「揀1月1號收樓感覺會更加特別，亦都多謝公司送呢份大獎畀我，我終於都收到樓可以做業主型返一次喇！希望試吓獨居，獨立一吓，每月供樓係支出多咗，幸而暫時頂得住，希望有多啲嘢做幫補吓。」

黃庭鋒在TVB新劇《OPM》首當男一，最近拍緊嘅《法證先鋒V》同黃宗澤(Bosco)有好多對手戲，被指受力捧成為Bosco接班人，黃庭鋒笑說：「我唔敢話係Bosco接班人，前面仲有好多人排緊隊！」4年前兩人合作拍過《守護神之保險調查》：「Bosco好記得我，尤其當時我同歐鎧淳喺嚴寒落水，游到口唇發紫。」黃庭鋒好欣賞Bosco嘅演出風格，既輕鬆又認真，令劇組都覺得好舒服。