康仔自報行程碎婚變疑雲

星島日報-娛樂

更新時間：10:55 2016-07-20 HKT
發佈時間：00:49 2002-10-14 HKT

(星島日報報道)自從蘇永康因搖頭丸事件在台灣接受勒戒之後，有關康仔的負面新聞似乎尚未平息，除了指康仔的形象嚴重受損，最近有報道指康仔的婚姻亦備受考驗，康仔和太太只是表面恩愛。

　　報道指康仔生日在即卻孤伶伶捱飯盒度過，整日足不出戶，兼且獨自去幫襯便利店，連日來都不見其太太Jane陪伴在側。同時報道中又訪問了康仔在新加坡的鄰居林太，更說康仔的外母向相熟的鄰居透露女兒「嫁錯郎」云云。

　　蘇永康前晚為《健康快車光明之旅》節目錄影，當記者只是說問他的傳聞事件，康仔已知道記者的來意，黑口黑面說：「唔使問啦，信五成都死。」康仔帶點怒氣說：「我去足五日街，竟然說我足不出戶，可能要我同埋記者一齊去游水或者揼骨啦，同埋有些相片是七月和九月的時候影到，咁都可以拿出來砌成一個故事，我都唔使講啦。」

　　康仔語氣激動且帶怒氣：「話我生日前兩天和太太高調出現蘭桂坊，我邊有高調，最高調只係上次同太太手拖手行出機場。」然後一口氣講出生日前後日子的行程，因為他剛為信用卡繳費，所以很清楚。

　　康仔強調跟太太的感情無問題，好得好緊要。問到太太有為這些報道嬲嗎？康仔說：「她還好。不過，外母就有些嬲，外母話根本無鄰居姓林，附近所住的都是外籍人士和馬拉人，無人姓林，又話我老婆成個月無返過新加坡，事實上她13號都返過去啦，咪咁離晒譜啦。不過，大家就當《老夫子》和《幻海奇情》去睇，我預計陸續有來，下次可能話我有愛滋病，對這些報道經已習慣，沒打算追究。」

　　此外，早前康仔和栢芝等人蒲夜店，康仔表示當晚老婆都有份去。是否撞到小春，大家一齊坐？康仔說：「係呀，同雷宇揚、谷德昭等人一齊坐，經過那件事之後，當然是同熟人一齊，還會很小心，躲在在一間房裏，(當時栢芝和小春是否雞啄唔斷？)我沒留意，在這些環境，我只會在我老婆視綫之內，唔通周圍走咩，未衰過咩，雖然不一定要有老婆在身邊，總之是唔熟唔坐啦！」