鄭裕玲玩《一筆OUT消》奪80分

更新時間：10:12 2016-07-19 HKT
發佈時間：02:07 2001-08-12 HKT

　　（星島日報報道）無綫密鑼緊鼓籌備中的《一筆OUT消》，昨日首次搬出電視城，移師荃灣愉景新城做面試，吸引逾五百市民排長龍，已是意料中事。細路又來，阿婆又來，就連抱住小朋友的師奶也來試一試，識字唔識字嘅都來玩，好不熱鬧。而自命智慧與美貌並重的鄭裕玲，當然要以身作則，接受問題大測試。結果點﹖十五題中答對十二條，論分數，就有80分，成績當然算係好啦！

　　《一筆OUT消》首次搬出戶外作筆試，鄭裕玲主持鳴鑼儀式，隆隆重重，好不威風﹗不過講到最威，當然係DoDo姐接受記者考驗時，十五題中答對十二題，有成80分，成績算是優異啦﹗今次TVB預備了六十條問題，就算事前熟讀答案，都要記性好至得啦﹗

　　DoDo姐答完問題，知道自己的成績後，便以其Miss Mo的權威口吻說：「我讀書時地理、聖經、英文都好掂㗎，係數學就差啲﹗」問到DoDo會否負責出題目，她又是好權威咁講：「我哋有大把勁人啦﹗其實我唔係好巴閉㗎咋﹗我只係公司嘅一部分，個節目係要靠好多人去做嘅﹗」一招連消帶打，又謙虛，又話自己人強馬壯，DoDo果然高手。

　　講到出題目，監製說：「題目是由二十名TVB嘅資料搜集員負責，還有其他教授、專家提供意見，而常識題佔60%、學識題佔25%、娛樂題佔15%，冇讀過書唔等於一定唔得，因主要是考常識題。」

　　難怪昨日來面試的市民中，的確乜人都有，其中有個六十九歲的曾婆婆，就是一位唔識字的老人家，可惜最後都是落選了，未能創造出神話。