帶隊東京巡唱何超儀翻唱山口百惠名曲

頭條日報-娛樂

更新時間：04:19 2017-11-02 HKT
發佈時間：00:00 2017-11-02 HKT

上月尾，何超儀帶其樂隊Josie and the Uni Boys喺東京開咗四場巡迴 Show。雖然日本近月受連場颱風吹襲，東京天氣亦相當唔穩定，但去旅行就話延期避風啫，開Show就一定風雨不改。好彩打風無阻歌迷熱情，四場門票一早全部售罄。撰文:廖思慧
雖然何超儀主力唱廣東及國語歌，但日本歌迷依然聽得好投入，又跳又叫，甚至走埋上台一齊玩。而超儀出發前為報答日本歌迷，特別選唱山口百惠名曲《Payback 》，不諳日語嘅佢更努力背歌詞，希望喺現場能唱畢全曲，為加強搖滾味道，其樂隊更把此曲重新編排，配合埋超儀低沉的聲線，真係幾有山口百惠味道。
歌迷好High
　　東京巡場地點包括六本木、下北沢及涉谷，31日晚撞啱萬聖節，超儀為配合氣氛，以睡袍look現身，而樂隊成員更以一身Power Rangers打扮上台，Rock風配Cutie打扮，將現場氣氛推至頂點，全場High到爆。之後，期間限定Power Rangers仲去咗涉谷街頭同㗎仔㗎妹一齊過萬聖節，開心到癲。
　　超儀表示：「上機嗰日，知道有颱風吹去日本，好彩個Show如期舉行，難得歌迷熱情不減，令我哋好感動。為我哋日後喺海外嘅發展打咗支強心針。」