欣賞黎明風趣又貼地 阮兆祥恨搵金句王做嘉賓
發佈時間：00:00 2016-04-15
為宣傳5月在伊館舉行的《阮兆祥硬食放題棟篤笑》，阮兆祥變身「抽水王」，除惡搞「野蠻港女上山記」外，又學足金句王黎明邊駕車邊Hip Hop。祥仔坦言今時今日好Like風趣又幽默嘅黎明，好想發英雄帖邀請他捧場，「近年佢個人放鬆咗，好貼地，好有魅力，所以喺四大天王中我最想扮佢！」
阮兆祥扮嘢功力好厲害，在棟篤笑記者會中就模仿「財爺」曾俊華坐美食車出場向現場人士派糖，又同「埃及油王」陳志雲對答，取笑無線高層余詠珊唔化(妝)，笑中有話。祥仔自言對自己有要求，每次要扮演唔同嘅人物，觀眾先唔會覺得悶，所以特別喺網上搞咗個《十大人物選舉》，從唔易坤、唔上昇、功夫肥貓、牛丸之、獎勵人、蔡England、防蟲、麥dollar、唔自然、吹歪理中投票揀選最想祥仔扮演既人物，他說：「今次喺政界、演藝界中揀6個人物去扮演，係一份好大嘅功課，要物色由10歲至60歲唔同年齡階層都認識嘅人真係唔容易，而且扮演全新人物要搵出特質同可愛地方，好有挑戰性。」
讚好Leon有哲理
祥仔坦言黎明好合乎扮嘢要求，除大人細路都認識外，亦好hot好有話題性，他笑說：「佢依家好貼地，最重要覺得舒服開心，咁就會好自然同埋好有魅力。佢啲『金句』好有哲理，如唔會空肚食早餐，食早餐前先飲水滋潤喉嚨有助腸道蠕動消化食物，佢咁講其實好有道理，只不過大家消化唔到佢講乜啫，所以我絕對支持Leon。哈！最好我哋可以互撐互相做宣傳，話哂我幫佢買咗10張演唱會飛，而我就好歡迎佢隨時嚟捧場。」至於表演嘉賓係甜品，賣關子先，入到場自然知喎。
採訪：方騫平 攝影：沈灝南 場地：紅磡都會海逸酒店
