錢國偉百萬婚宴玩驚喜 Big4古惑仔大戰Deep V天使
發佈時間：00:00 2015-09-16
錢國偉Wilson將於下月8日迎娶女友陳宛蔚Calinda，結束六年愛情長跑，早前豪花50萬飛歐洲拍攝的婚照終於曝光，十指緊扣遊走希臘神殿，浪漫滿瀉。53歲做老襯，Wilson揚言婚宴當晚要玩驚喜，只讓未婚妻Calinda參與禮服、婚照、賓客排位等前期工作，自己則跟兄弟團密謀婚宴當晚閉門狂歡，Big4古惑仔個個一呼百應，準新娘Calinda說：「Wilson朋友多，都擔心會請漏人，預計班天使晒冷上場，姊妹團就由江美儀、莊思敏、JJ賈曉晨上陣，希望玩得盡興！」 撰文：彭燕燕
鍾意玩驚喜的錢國偉，去年暑假趁Big4在美國登台，即搵兄弟班幫手搞氣氛，成功向女友Calinda求婚，跪地送3卡鑽戒不特止，還花近50萬豪請女友一家歐遊影婚紗照，14日遊走杜拜、希臘、土耳其等地取景，帶備20套靚衫赴會的Calinda冧到暈，她說：「行程全由我安排，邊走邊影好辛苦，慶幸出來效果好滿意，最感動係Wilson頂得順杜拜五十幾度高溫，沒半句怨言，仲話完成手頭上工作便帶我再去一次當蜜月旅行。」據悉出名錫女友的錢導早已送上價值20萬鑽石頸鏈及大量金器，還找胡杏兒御用設計師Kev為她造婚紗，Calinda說：「婚禮當晚件婚紗我自己設計，結婚一世一次，當然要留個美好回憶。」
閂埋門狂歡
在娛樂圈人緣甚廣的錢國偉娶老婆，當然要大搞，在洲際筵開58席宴請近百圈中好友，獎門人拉隊到賀，Big4古惑仔等沙煲兄弟亦隨時候命，誓要閂埋門狂歡盡興。
說到婚禮細節，Calinda坦言自己乜都唔知，她說：「我只知Wilson剪了條片當晚播，話要畀個驚喜我，作為新娘子，我只知要準備四套靚衫，其他全交由Wilson負責，其實我好擔心，怕會請漏嘉賓、安排失誤，又驚那些驚喜太爆會受唔住，不過如果真係有甩漏，希望朋友能體諒，姊妹團由江美儀為首，莊思敏、賈曉晨、周家蔚等都講明唔會留手，加埋班天使坐陣，我諗婚宴當晚會玩得好癲。」
至於造人大計，Calinda笑言沒壓力，她說：「雖然大家都好鍾意小朋友，但這是上天安排的，隨緣啦，你都見Wilson好忙，結婚前一日都話要開工，依家還在北京開會籌拍新電影。」
