入無線目及實女友 鍾嘉欣伍允龍又復合
發佈時間：00:00 2015-04-23
32歲的無線花旦鍾嘉欣，同37歲武打奀星男友伍允龍(Philip)傳8年情玩完。死因係嘉欣BB多年來抵受不住女尊男卑壓力，決定一刀切。亦有傳因合作多次的陳展鵬做「小三」，二人早前在紐西蘭工作時仲穿情侶裝「蜜」遊超市。以為「欣龍戀」經唔起八年之癢，原來近日Philip已秘密箍煲成功，而為貼身睇實未來老婆，金牌監製更向本報爆料指Philip 八月會處男殺入電視圈拍劇，借電視圈發圍。男友生性，嘉欣變心軟，日前仲公開向伍允龍大派定心丸：「我哋關係OK。」仲拍心口話會畀貼士男友拍劇用，一天都光晒啦！
採訪：方騫平
同樣在美國長大的嘉欣BB和武術指導出身的伍允龍好啱Key，07年拍電影《十分愛》撻着，但因二人事業好大距離，被迫愛得低調。形象清純的嘉欣BB一直多追求者，更傳出佢同合作多次的陳展鵬戲假情真。兩人先後合作拍《巨輪》和《大藥坊》等，又攬又錫，日久生情。13年尾，有周刊更影到陳展鵬以紅色跑車秘載嘉欣BB，惜近上環時遇上交通意外，搞到發展地下情的嘉欣BB要跳車逃走，令緋聞甚囂塵上。直至今年初，有指嘉欣BB決定斬纜，情歸「煎pan」，陳展鵬即開心在個人網誌上大晒疑似同嘉欣BB的拖手相(其後刪除)，更在外地以情侶裝洩蜜。
宣示主權
不過經Philip死纏箍煲，「欣龍戀」又再翻叮。伍允龍更正式入TVB拍劇目及實女友，宣示主權。據TVB王牌監製文偉鴻（Jazz）率先爆伍允龍將會夥拍羅仲謙、袁偉豪等拍一部以城寨為背景的武打劇，三男飾演英雄人物，正義聯盟對抗惡勢力，拳來拳往，所以睇中識詠春真功夫的伍允龍。一眾演員拍前要秘密練兵學拳，劇中伍允龍和袁偉豪兩男仲會力爭點名力捧的港姐季軍劉佩玥，力谷Philip上位。Jazz強調，繼甄子丹於94至95年幫亞視拍過《洪熙官》同《精武門》後，多年來電視台無見過真正的功夫劇，伍允龍有武術底子係理想人選，傾咗三個月先成事！嘉欣見男友有機發圍，重拾舊情。
被指做小三的陳展鵬無奈表示：「我和佢(鍾嘉欣)從來都係同事、朋友，冇其他關係，亦冇多想！我要尊重佢，因為我係男人。真係唔知道點解佢哋嘅事會關我事？我應該係讀社會大學，而唔係小學3年級，如果我係小學3年級可能我會生氣！」他強調所謂超市蜜會是一班人的。
