爭女爭出火沈震軒鬧羅仲謙「小學雞」

頭條日報-娛樂

更新時間：18:43 2015-06-19
發佈時間：00:00 2014-10-03

       TVB青春愛情劇《衝線》，未播出而爆出新捧女主角蔡思貝係發電機，姣完沈震軒再電大隻謙羅仲謙。日前新劇拉隊去台灣拍攝外景，幾位主角寓工作於娛樂，幾鬼Happy。日前，兩男主角沈震軒和羅仲謙在中環碼頭拍戲，二人在劇中為爭蔡思貝搞到無Friend做，公事上又針鋒相對，結果沈震軒大鬧對方係「小學雞」，然後拂袖而去。採訪 : 李維隆、李權威
      早排無線趕拍新劇《衝線》，戲中4位主要男角沈震軒、羅仲謙、周志文和溫家偉，日頭拍完單車戲，夜晚就趕拍廠景和外景。眾演員現正台灣拍外景，臨行前謙仔仲爆：「19日拍百幾場戲！」幾咁緊迫。
      日前晚上，兩大男主角沈震軒和羅仲謙在中環碼頭旁拍鬧交戲，二人西裝骨骨埋身兇對方，沈震軒怒目對方說：「好心你咪咁小學雞啦！……升唔到職，阻我發達。」二人嘈交戲，兩take收貨。之後二人同記者友善傾談，羅仲謙唔覺意爆新劇會有續集：「套戲幾乎全男班，拍得好開心。(蔡思貝和吳若希最後情歸何處？)同我囉，佢(沈震軒)輸晒，不過對佢好㗎！可以拍續集，導演錫佢。」劇透完後，兩男再會合周志文和溫家偉拍場巴打飲酒散心戲，見沈震軒為拍戲唔介意堅隊啤酒，好襟撈喎！