愛上筋肉杜汶澤何超儀忘我演戲好High

頭條日報-娛樂

更新時間：10:34 2015-06-19 HKT
發佈時間：00:00 2014-02-08 HKT

       何超儀繼十年前憑《豪情》中趙啷啷一角勇奪金像獎「最佳女配角」後，早前再接拍《3D豪情》，與杜汶澤結片緣。二人為套戲，女方增肥、男方操肌，勁專業。新片中，操肥做老妓的超儀犧牲色相，仲要愛上筋肉人杜汶澤，其中一幕超儀齋睇阿澤的AV片，都可以忘我自High，好考演技，連監製陳慶嘉都大讚超儀比十年前「演得更盡更放」，十個Like呢！撰文：林靜雯
      去年尾，超儀、杜汶澤等拉隊赴日本拍攝新電影《3D豪情》，為凸顯角色的淒涼潦倒感，導演落order要超儀增磅埋位，一日五餐薯條炸雞，甜品是奶油pancake，成功谷肥15磅演風俗娘(過氣老妓)。戲中，超儀做埋AV男優初哥杜汶澤的接頭人，助阿澤在日本AV界發展，更要即場指導阿澤拍AV，結果日對夜對，超儀漸漸愛上同樣留落異鄉的肌肉澤。
      其中有幕超儀大膽的Solo自慰戲，好考演技，講超儀在家獨自睇阿澤成名後的AV片，睇睇吓一時情慾高漲發傻狂嗌，點知意中人阿澤來電，超儀接到阿澤電話時好尷尬，但又禁不住High爆情緒，遂一邊跟對方傾電話，一邊瞓上牀開始用手撫摸身體，忘我好High，鏡頭特寫佢咬牙切齒肉緊表情，超儀發揮得淋漓盡致。
      事後超儀話：「雖然之後導演畀咗啲參考我睇，但我都無睇，我覺得呢幕戲係有需要先會盡情拍，而自慰戲比趙啷啷一角更大膽更難演，因為前者要靠表情神緒，我要揣摩吓先表達到，後者則靠動作。」監製陳慶嘉亦讚超儀比第一部《豪情》「演得更盡更放」，仲讚超儀加入了自己的豐富演技元素，令角色更立體。另一幕講超儀被前度誘騙再溫馨一夜，結果一覺醒來，人財兩空，淒涼超儀喊都無謂。超儀嘔心瀝血為拍好新片，睇嚟有機會再角逐電影獎項喎！