沙田早晨│「越駿」雙雄家俊視瑰寶
更新時間：15:40 2026-09-22 HKT
發佈時間：15:40 2026-09-22 HKT
發佈時間：15:40 2026-09-22 HKT
字體大小
近兩季都有一位華將跑出，今季會否是季初已彈出的梁家俊，或回勇的何澤堯，論騎功兩人不分上下，不過家俊支持力一向不穩定，難得今戰巴度停賽而接手了「越駿齊歡」及「越駿聯歡」，剛周日專誠到場為兩駒出試已充滿睇頭，到今朝更分別同羅富全和黎昭昇傾談。
應龍飛影皮耶搵袁妹
今朝伍鵬志一度主動搵袁幸堯傾談。
馬季舉行半個月，不少已跑過的賽駒再次亮相，這些馬熱完身開了氣，再跑隨時有進步演出，其中「應龍飛影」上仗初跑谷草得第四，看當晚場地不利放頭，呢席殿軍水準極高，甚至今朝晨課亦吸引，向來低調的伍鵬志，一度主動搵袁幸堯傾談，而騎練明晚合作兩駒。
繼往開來騎練傾大計
「繼往開來」今朝試閘前艾兆禮同文家良一度出雙入對，動態極之積極。
「繼往開來」上季尾踏升軌，先在四班谷草千二，全程走三疊兼留到尾四追上勝出，之後回升上三班，力拚之下僅負得第二，今次隔季捲土重來排五檔，看賽前試閘走勢洶湧，勇態保持有餘，加上今朝試閘前艾兆禮同文家良一度出雙入對，動態極之積極，可放心追捧。
紫荊傳令阿游落埋手
今朝「紫荊傳令」出試游達榮高度重視，跟出跟入之餘，甚至落手拖馬。
過去兩季初往往較遲發力的游達榮，今季一改慢熱作風，開鑼日即憑「光年程祥」敲響勝鼓，今戰游廄派出不少惡馬上陣，其中打吡第五名的「紫荊傳令」，轉戰谷草有望賺級數，而且更重要配潘頓人強馬壯，今朝此馬出試練者高度重視，跟出跟入之餘，甚至落手拖馬。
