沙田早晨│希廄雙雄騎練傾到笑
更新時間：16:37 2025-11-03 HKT
發佈時間：16:37 2025-11-03 HKT
發佈時間：16:37 2025-11-03 HKT
字體大小
希斯攻勢唔識停，剛戰梅開二度，已寫下連贏五日佳績，並只落後廖康銘僅五W。看周三出馬既多又實力不俗，極大機會再添進帳，其中「古惑大師」同「禾道威」最要留意，今朝耙地後交由霍宏聲和艾道拿出跳，課後希斯接馬捉住兩好手開會，且三人同時笑容滿面。
「樂勝天下」輝哥落隧道
「樂勝天下」主力在千二出戰，另兩次跑千四亦上名，今次卻變陣，唔跑千二或千四，安排大幅增程跳上一哩，合適與否要跑過至知。不過今朝出跳確吸引不已，未夠五點已進行試跑，亦是最早出跳的參戰馬，當時姚本輝一貫跟出跟入，課後甚至落埋隧道底接馬。
「樂勝天下」(圖) 今朝出跳確吸引不已，未夠五點已進行試跑，亦是最早出跳的參戰馬，當時姚本輝一貫跟出跟入，課後甚至落埋隧道底接馬。
「可期而遇」紹仔執好籌
講開姚廄馬，六點十五分出試的「可期而遇」亦相當搶鏡，姚本輝同樣跟出跟入服侍周到。更吸引是出跳前先捉住鞍上人蔡明紹猛傾，當時更不斷指手畫腳，相當肉緊教路，其後見到「可期而遇」出來，輝哥就親托紹仔上馬，及後出跳完畢，又趕返機坪向紹仔追問。
「至尊瑰寶」家俊好詳盡
除了田泰安和潘頓，梁家俊今朝亦換了帽笠，改用了黑色的一款。事實上，佢換帽都好應該，對上一次贏馬已是十月八日「至尊瑰寶」，成個月無贏馬，換架餐轉手風是正路之事，而講開「至尊瑰寶」，今朝試跑當然由家俊親試，矚目在於課後向羅富全詳細匯報。
