星級大搜查丨鬼月星級驅鬼大法 TVB小花問紫微斗數 周家怡霸氣掹插蘇 陳法齊師傅力證：講粗口有用！
發佈時間：12:30 2025-09-06 HKT
《星級大搜查》一連兩集「鬼月專題」來到第二集，我們找來一眾藝人分享獨門驅鬼大法！上一集《星級大搜查》我們成功搜查到兩位靈異體質藝人包括張與辰及姚焯菲。今集我們請來明星分享恐怖撞鬼經歷之餘，更公開他們的驅鬼大法，可謂奇招盡出，更有TVB小花爆出笑料！
梁靖琪與郭柏妍推薦「夾手指」
相傳當人「鬼上身」時，用紅筷子夾中指可以自救，圈中「傻大姐」梁靖琪與郭柏妍都有聽聞這個方法，不過好明顯未實踐過。郭柏妍表示：「用咩辦法去驅鬼？我都唔知喎……攞筷子夾吓自己隻手？定係夾人隻手呢？」至於她的另一個方法是「問紫微斗數」，經記者提醒才驚覺算紫微斗數是算命方法無助驅鬼。至於梁靖琪則是聽聞馬來西亞的朋友透露「夾中指」救了老婆一命，因此相信「夾中指」可以驅鬼。
姚焯菲驅鬼都要唱歌
自覺有靈異體質的姚焯菲屬於樂天派，連驅鬼方法都有個人特色，她說：「我會祈禱……同埋唱歌，同埋諗啲開心嘅嘢，因為當你頻率唔同就會趕走佢。」林峯表示在娛樂圈工作難免會有時運低撞鬼的時候，但近來當旺的他沒有遇上靈異事件：「都係嗰句，平生不做虧心事，夜半敲門心不驚。」譚俊彥則表示，如果靈體是他的親人，並不打算驅鬼，「或者我想念我親人，我唔想驅（鬼）呢！」
陸詩韻「轉台」即成功驅鬼
陸詩韻分享，入行前做空姐常要在外地過夜，難免遇過靈異事件。她有晚需要在澳洲過夜，在酒店房休息時，竟遇到難以解釋的情況。她說：「我開住電視有啲聲啦，半夜朦朦朧朧醒嘅時候望望電視，係個黑白CCTV，我郁佢又跟住一齊郁，即係個CCTV好似影住我自己咁。」這時雖有些害怕，但她即時醒來轉台，之後畫面便消失。
靈體扮女星嚇窒周家怡
周家怡亦同樣在外地遇上靈異事件，「喺台灣試過一次，間酒店房一入去已經唔係好舒服。」她表示由於準備，已提前將房內的燈關上，「床尾有張枱，有塊鏡嘅，就見到有個人企喺度郁，整嘢，當時同我同房係另一個女藝人Rachel。我就同Rachel講……因為我以為係Rachel嚟，我就話『Rachel唔怕呀，你開燈啦』，突然Rachel喺呢邊話『咩事呀』，我話『冇事呀，你繼續瞓啦，我而家要開開燈呀』。」周家怡表示因不想嚇倒同行的女藝人，因此沒有即時告訴對方，而自己則在心內默念：「我即刻瞓落床『嗱！我哋只係瞓一晚，你唔好搞』。」連詩雅亦分享，有次睡覺時聽到枕頭內傳來小朋友叫救命的聲音，她選擇當晚不再睡覺，致電給老公陳家樂聊電話。
吳若希以氣場擊退靈體
吳若希分享，曾在不夠休息及生病情況下開工，她於拍攝現場休息時，聽到類似老鼠出沒的「吱吱聲」。她說：「以為係老鼠，就搵咗成個地方都唔見有老鼠。當時我因為太攰、太辛苦，我就好大聲嗌咗一聲『唔好嘈啦！可唔可以靜靜呀！瞓個覺啫』啲，老鼠吱吱聲就冇咗。」
胡敏芝用粗口對抗靈體
在TVB劇集《麻雀樂團》中表現出色的胡敏芝，也向《星級大搜查》分享驅鬼大法，「祈禱同講粗口囉……即係祈完禱再講粗口，去嚇走佢囉！」特別強調先後次序，描述得非常仔細。
陳法齊師傅：講粗口係可以嘅
六壬神功法科師傅陳法齊向《星級大搜查》分享，說粗口驅鬼原來真的有效，他說：「講粗口係可以嘅，不過你要有一定氣勢，你要惡過佢。有時被鬼壓，可能不能動、不能出聲，在心裡想都可以的。」萬一被鬼纏亦有自救方法，「睇下佢有咩目的啦！舉個例子你跟佢冇咩仇口嘅， 可能就化啲嘢畀佢，佢都會走。」此外，多做運動、曬太陽及早睡有助提升自身陽氣，一般靈體很難長期跟着你。萬一仍解決不了，身體漸漸變差就代表情況開始嚴重，需找專業人士幫助。
入酒店房前敲門是否有用？
此外，陳法齊師傅分享，當入往酒店時想避免遇上靈體，可以先感受一下環境會否令你不舒服，如頭痛、不自在等。萬一房內有不自然現場，更應該警覺，「例如晚上睡一覺，電視機突然開啟，水喉自行開啟，這些都是顯示給你的訊號。」至於入酒店房前敲門又是否有助避免靈異事件發生？他說：「其實酒店敲門純粹打個招呼，免得有時怕佢唔知道你入嚟，一開門畀你見到，你又唔高興，佢又唔高興。但如果鬼嘅怨念好重，佢是嗰度地縛靈，佢覺得嗰度係佢住嘅土地，縱使你敲唔敲門都好，總之你入去住，佢都一定會騷擾你。」他建議不妨放平安符在身上保平安，防止靈體接近自己。
點擊睇埋《星級大搜查》「鬼月專題」（上集）：星級大搜查丨靈異體質藝人大公開 張與辰驚爆有陰陽眼親述撞鬼經歷：有掂過我 姚焯菲認易「瀨嘢」
