女神配對計劃丨周嘉全因李芷晴被批世界大兵！因一事討厭自己徹夜難眠內疚感不斷湧上

更新時間：18:30 2025-06-14 HKT
發佈時間：18:30 2025-06-14 HKT

女神配對計劃丨由有「金牌媒人」之稱的林盛斌（Bob）主持的TVB戀愛綜藝真人騷《女神配對計劃》於6月8日（星期日）播出首集，在節目上，林盛斌與「星級花生團」攜手為TVB五大女神梁敏巧（Maggie）、葉蒨文（Sophie）、李芷晴（Stephanie）、關嘉敏（Carman）及羅毓儀（Yuki）公開招親搵男友。

周嘉全食檸檬後撰長文稱湧出內疚感

在《愛．回家之開心速遞》飾演「Elaine」的李芷晴，在首集被暗戀7年的藝人周嘉全公開示愛，但李芷晴當眾拒絕並惹來兩極的聲音，其後周嘉全在《東張西望》主播要求下次示愛，再度食檸檬收場，結果不少將矛頭直指李芷晴，周嘉全昨晚（13日）撰長文表示：「內疚感不斷咁湧上嚟。」

周嘉全再向李芷晴示愛：

周嘉全第二集播出之前道出自己感受

參與《鐵拳英雄》及《奪命提示》、入行超過十年的周嘉全拎着一副素描畫向李芷晴示愛，不過遭李芷晴當眾拒愛並說：「其實我一直都冇喺呢方向諗過，因為我哋都幾fd，係係少少fd zone咗。」其後周嘉全說：「其實揀唔揀我，我一直都會咁欣賞妳，而且我會相信妳選擇幸福嘅能力，所以我係....唔緊要嘅。我哋由頭到尾都未試過有約會，一直都係以朋友身份相處，我頭先都講過，我相信佢選擇幸福嘅能力，呢一樣我係真心。」周嘉全昨晚（13日）在IG撰長文稱決定第二集播出之前道出自己感受，全文如下：

感謝大家嘅comment，每個平台嘅comment我都有睇吓，小紅書連登Facebook IG Threads各新聞報道，咩承受我的狂畫野，咩世界大兵，咩甚麼都不是你是二等兵士，全部都笑到我肚痛。首先，我完全冇劇本，0，nothing。
無錯，我第一次海選個態度好唔同，我完全冇勇氣去承認自己鍾意芷晴。原來未有互動環節你就要表露心跡。六七部cam影住自己，要面對全香港甚至內地嘅觀眾，我開唔到口去承認去表白。對於七年嘅友誼，我一直小心翼翼去珍惜。
但係，我返到屋企之後幾晚都瞓唔着，內疚感不斷咁湧上嚟。另外四位都係非常優秀同善良嘅女仔，但係問我一萬次，我可能都係揀李芷晴，點解就冇勇氣同其他人承認呢件事？我對於呢個懦弱嘅自己十分之討厭。
呢個時候，我老竇知道我參加呢個節目，竟然鼓勵我放膽去愛。需知道就算我以前讀書幾咁努力考好成績，又或者工作上幾辛苦得到小進步，我父母從來都唔會有一句慰問或者鼓勵。試過電視機播緊我嘅一場主戲，可以望都唔望下，佢哋就係我嘅父母，唔奚落我已經好好。所以，我老竇鼓勵我嘅一刻係好震撼，三十一年嚟第一次收到鼓勵（雖然佢提議我嘅表白方式我做咗嘅話而家喺警署）。呢一個，係我喺呢個節目得到嘅最大得著。我嗰刻覺得有少少天意主使。
表白呢件事本身只有一個意義，就係話畀對方聽佢值得擁有愛。當刻或者將來發生咩事，全部都需要心理準備。我又唔係完美嘅人，凡發生必合理。另外其實好少朋友留意到一點，我雖然當刻好失落，但其實我講完出嚟好長嘅一段時間我都係keep住好爽，對於敢愛敢恨嘅自己，我好自豪好滿意。我好proud of自己，夠膽同對方講佢值得被愛。
昆德拉嘅《笑忘書》裏面話過，男人其中一本書係失戀之傳記，「最有趣的大概是這一部」、「痛心的充滿未竟之可能的歷史」，而家我嘅失戀之傳記又多咗一頁。我當咗係失戀嫁啦，吓點解呀都無戀過。自來也都當綱手係失戀啦，男人係咁㗎。
再者，我學每樣野都要打工賺返嚟，我食嘅每粒飯入嘅每滴油入面都有血有汗。曾子話「士不可以不弘毅任重而道遠」。就算我係甚麼出身，我都有我條路要行。幾多線演員都要認真對待自己工作。只要仍在努力的事就不算失敗。我希望我嘅出現會令大家鍾意呢個世界多啲，因為我熱愛我嘅生活。
感謝每位觀眾，我喺呢個節目就好似鞭炮咁啪一聲無咗，之後嘅精彩留待其他參加者、用心嘅節目組，同五個好好嘅女仔為大家呈現。