女神配对计划丨周嘉全因李芷晴被批世界大兵！因一事讨厌自己彻夜难眠内疚感不断涌上

更新时间：18:30 2025-06-14 HKT
发布时间：18:30 2025-06-14 HKT

女神配对计划丨由有「金牌媒人」之称的林盛斌（Bob）主持的TVB恋爱综艺真人骚《女神配对计划》于6月8日（星期日）播出首集，在节目上，林盛斌与「星级花生团」携手为TVB五大女神梁敏巧（Maggie）、叶蒨文（Sophie）、李芷晴（Stephanie）、关嘉敏（Carman）及罗毓仪（Yuki）公开招亲揾男友。

周嘉全食柠檬后撰长文称涌出内疚感

在《爱．回家之开心速递》饰演「Elaine」的李芷晴，在首集被暗恋7年的艺人周嘉全公开示爱，但李芷晴当众拒绝并惹来两极的声音，其后周嘉全在《东张西望》主播要求下次示爱，再度食柠檬收场，结果不少将矛头直指李芷晴，周嘉全昨晚（13日）撰长文表示：「内疚感不断咁涌上嚟。」

周嘉全再向李芷晴示爱：

周嘉全第二集播出之前道出自己感受

参与《铁拳英雄》及《夺命提示》、入行超过十年的周嘉全拎着一副素描画向李芷晴示爱，不过遭李芷晴当众拒爱并说：「其实我一直都冇喺呢方向谂过，因为我哋都几fd，系系少少fd zone咗。」其后周嘉全说：「其实拣唔拣我，我一直都会咁欣赏妳，而且我会相信妳选择幸福嘅能力，所以我系....唔紧要嘅。我哋由头到尾都未试过有约会，一直都系以朋友身份相处，我头先都讲过，我相信佢选择幸福嘅能力，呢一样我系真心。」周嘉全昨晚（13日）在IG撰长文称决定第二集播出之前道出自己感受，全文如下：

感谢大家嘅comment，每个平台嘅comment我都有睇吓，小红书连登Facebook IG Threads各新闻报道，咩承受我的狂画野，咩世界大兵，咩甚么都不是你是二等兵士，全部都笑到我肚痛。首先，我完全冇剧本，0，nothing。
无错，我第一次海选个态度好唔同，我完全冇勇气去承认自己钟意芷晴。原来未有互动环节你就要表露心迹。六七部cam影住自己，要面对全香港甚至内地嘅观众，我开唔到口去承认去表白。对于七年嘅友谊，我一直小心翼翼去珍惜。
但系，我返到屋企之后几晚都瞓唔着，内疚感不断咁涌上嚟。另外四位都系非常优秀同善良嘅女仔，但系问我一万次，我可能都系拣李芷晴，点解就冇勇气同其他人承认呢件事？我对于呢个懦弱嘅自己十分之讨厌。
呢个时候，我老窦知道我参加呢个节目，竟然鼓励我放胆去爱。需知道就算我以前读书几咁努力考好成绩，又或者工作上几辛苦得到小进步，我父母从来都唔会有一句慰问或者鼓励。试过电视机播紧我嘅一场主戏，可以望都唔望下，佢哋就系我嘅父母，唔奚落我已经好好。所以，我老窦鼓励我嘅一刻系好震撼，三十一年嚟第一次收到鼓励（虽然佢提议我嘅表白方式我做咗嘅话而家喺警署）。呢一个，系我喺呢个节目得到嘅最大得著。我𠮶刻觉得有少少天意主使。
表白呢件事本身只有一个意义，就系话畀对方听佢值得拥有爱。当刻或者将来发生咩事，全部都需要心理准备。我又唔系完美嘅人，凡发生必合理。另外其实好少朋友留意到一点，我虽然当刻好失落，但其实我讲完出嚟好长嘅一段时间我都系keep住好爽，对于敢爱敢恨嘅自己，我好自豪好满意。我好proud of自己，够胆同对方讲佢值得被爱。
昆德拉嘅《笑忘书》里面话过，男人其中一本书系失恋之传记，「最有趣的大概是这一部」、「痛心的充满未竟之可能的历史」，而家我嘅失恋之传记又多咗一页。我当咗系失恋嫁啦，吓点解呀都无恋过。自来也都当纲手系失恋啦，男人系咁㗎。
再者，我学每样野都要打工赚返嚟，我食嘅每粒饭入嘅每滴油入面都有血有汗。曾子话「士不可以不弘毅任重而道远」。就算我系甚么出身，我都有我条路要行。几多线演员都要认真对待自己工作。只要仍在努力的事就不算失败。我希望我嘅出现会令大家钟意呢个世界多啲，因为我热爱我嘅生活。
感谢每位观众，我喺呢个节目就好似鞭炮咁啪一声无咗，之后嘅精彩留待其他参加者、用心嘅节目组，同五个好好嘅女仔为大家呈现。