《中年好聲音3》導師指趙浚承有老婆加持不恰當點名王馨平：係咪感動到你，走音都唔緊要

更新時間：21:30 2025-05-07 HKT
發佈時間：21:30 2025-05-07 HKT

《中年好聲音3》決賽《中年好聲音3登峯之戰》將於5月11日（星期日）晚上7時45分在啟德體藝館舉行。趙浚承上集以98分奪得MVP，與張與辰、黃博、李金凱、劉洋、占士丁丁及陳芷盈攻入七強，不過趙浚承獻唱《Forever Love》時有老婆及表演時獲特別播放夫妻照加持，引網民質疑是否欠公平。日前曾任《中年好聲音3》導師的張崇德亦拍片分享看法，質疑幾位評審太着重於「感動位」，似乎對其他選手不公平。

張崇德談如何在主觀評分下保留公平性

歌手張崇德近來緊貼《中年好聲音3》戰況在YouTube頻道作評論，由於他曾任《中年好聲音3》團戰導師，加上做歌手的資歷夠深，不少網民觀看他的評論影片，都讚他評論公道。日前播出選出七強選手入決賽的一集，張崇德留意到不少網民質疑趙浚承奪得MVP入決賽是否欠公平，他先提出作為歌唱比賽評審，先要釐清評分準則。他列出歌唱比賽評審的評分紙大多將評分位分為「音準拍子」、「聲線氣息」、「技巧難度」、「感情投入」、「舞台表現」五大評分範疇，雖然評分都是有主觀性，但有列表中的範疇限制下，所有選手都以這五大範疇來判定分數，公平性相對較高，而他認為當晚的評審看來更著重於點評趙浚承的「感情」，質疑是否有對其他選手一視同仁。

相關閱讀：中年好聲音3｜終極七強背景逐個睇黃博、李金凱、趙浚承邊個係冠軍大熱？

張崇德認為趙浚承不值98分直斥欠公平？

張崇德點名王馨平

張崇德提到當晚客席評審王馨平，他說：「佢一開頭講，最緊要、最著重就係『感情』，感動到佢就會係高分，呢個咪係佢自己著重咗『感情』囉，『感情』對佢嚟講最緊要。嗱，呢個係我自己講啫，咁係咪感動到你，走音都唔緊要？」他舉例感動來源可以是電影、對白、情景等，「但而家係唱歌，唱歌的角度仍然有音準拍子、音色、演繹，有好多樣嘢……如果只係用『感動』咁就太過單一。」他認為如果一眾評審都認為「感情」非常重要，該集就應將評分位上的「感情投入」比例提高，「你如果用呢個準則話呢個參賽者，同樣準則亦要擺落另一個參賽者度，呢個係評判應該做嘅，你要有一致性，同埋要盡你能力去公平。」

張崇德質疑《中3》比賽選曲的設定

張崇德認為該集的主題是「經典情歌」，不過一眾評審明顯更著重「感情」，因此他認為：「如果係設定為『感動人的歌』可能會合理啲，目的係一定要聽到你嘅歌係感動到人。其實個設定，你點定都得，如果你設定好，大家都會跟從呢個方向去唱同畀分，但今集係『情歌』，如果只係睇『感動』……好似太感性。」張崇德直言感性及理想是在評分時是可並存的，音準及拍子都非常重要。他表示：「我覺得今集太感情，少咗理性，甚至有啲情緒化。好容易牽動到情緒，分數就會高，呢個我都覺得唔太理想。」

張崇德以伍仲衡作歌求婚作比喻

張崇德以自己的角度重看趙浚承當晚的表現作出看法，他表示：「大會加插咗佢同佢太太啲片段喺背景度，我覺得呢個係唔恰當，亦都係唔公平嘅！因為你咁做就會影響咗大家觀感，無論係視覺、感受、情緒上都會被牽動，呢個我覺得係非常之唔好。」他認為如果八位參賽者背景同樣有類似影像播放才沒有問題，「點解我要講呢樣嘢，因為你唔使理佢唱得好唔好呀，你有咁嘅畫面出嚟都已經影響咗。」張崇德更以伍仲衡當年作歌求婚一幕，他直言非常感動，「我當時都話好觸動到我，我都有啲眼濕濕，但係佢唱得一啲都唔好，但你喺嗰個環境下，睇到一件感動嘅事情發生，就自然會被感動啦！咁佢唱到走音，你一啲都唔會介意，因為你覺得個『心』重要過唱功呀嘛！其實對趙浚承都唔公平，因為你畀人有個唔好觀感，點解得你有呢樣嘢？係咪情緒綁架咗評判呀？如果佢真係唱得好好，其實需唔需要呢啲片段喺後面呢？」

王鄭浚仁8強止步惹爭議獲甄妮力撐？

張崇德點評趙浚承表現一般

張崇德以唱歌表現方面點評趙浚承，他認為趙浚承當晚表現並非特別好，他說：「我聽到嘅仍然有佢怪怪哋嘅『鴨仔聲』，當然你可以話成為佢嘅風格啦，但呢個都係同口形有關，有啲嘢係好大問題。你睇佢口形……其實就係影響發聲呀嘛！」另外，張崇德認為趙浚承唱歌時大細聲收放未夠自如，「對於我嚟講，如果你連聲音控制，你都未能固定到你自己同一把聲唱晒成首歌的話，咁其實呢個就係問題喇！」而他亦不認同趙浚承表現值98分，更抽出王馨平對不同參賽者的評分，發現她為劉洋、李金凱及趙浚承都分別給20分，他問道：「到底佢分唔分到呢三位邊個唱得好啲呢？嗱，呢個就係我話個準則，究竟評分標準裡面，大會要求評審係咪要分辨到邊個高啲、邊個低啲？定佢可以好隨心，咁係唔理想。」

↓立即下載星島頭條App↓