叱咤2023｜《叱咤樂壇流行榜頒獎典禮2023》張敬軒奪「叱咤樂壇我最喜愛的男歌手」台上多謝鏡粉

更新時間：00:10 2024-01-02
發佈時間：00:10 2024-01-02

叱咤2023／叱咤得獎名單／叱咤我最喜愛｜叱咤樂壇流行榜頒獎典禮2023今日（1月1日）晚上7時30分在亞洲國際博覽館一號展館舉行。今屆叱咤2023最受關注的「我最喜愛」系列獎項，當中「叱咤樂壇我最喜愛的男歌手」競爭激烈。

哪位歌手獲得「叱咤樂壇我最喜愛的男歌手」？

叱咤2023「叱咤樂壇我最喜愛的男歌手」最終由張敬軒從林海峰手上獲得。林海峰逐一介紹「我最喜愛的男歌手」五強名單，先提到張敬軒入行22年，在2014年獲得「我最喜愛的男歌手」後，就一直未能獲獎。林海峰又指張敬軒在2014年前對手大部份都是對手：「當前輩慢慢離開咗之後，佢就成為咗『我最喜愛的男歌手』。」林海峰表示張敬軒繼續做好音樂，但面對更多強勁對手。

林海峰見古天樂獲獎：有冇搞錯

林海峰又提到張敬軒在2018年不敵古天樂：「當晚我喺後台打開信封，見到古天樂三個字，同工作人員爆咗四個大字『有冇搞錯』，工作人員回返四個大字畀我『樂迷投票』，結果我將『我最喜愛的男歌手』頒咗一個影帝。」林海峰之後笑說：「2018年後，張敬軒之後面對第二個厄運，香港爆發咗開埠以來最大嘅流行，MIRROR大流行。」

林海峰以為張敬軒要等12年

林海峰提到姜濤連續兩年獲獎後，輪到Anson Lo：「我望落去嘅時候，心諗『你真係要等到Frankie拎埋獎先輪到你』，咁即係張敬軒要等多12年先拎到呢個獎。」輪到今年，又突然有尹光彈出，林海峰笑說：「你都叫軒公㗎啦，關愛座都有得坐，有乜理由坐關愛座都要讓位畀法，但無辦法，姜B、光B加埋都成百歲，你一定要讓位畀佢啦。」還笑言：「有無睇過長江前浪畀前浪推？呢個係違反大自然定律。而且呢個前浪嘅全名係叫AI尹光，人點同高科技鬥啊？」

隨後林海峰繼續笠張敬軒高帽，又表示：「有啲得獎人同我講：『唔好玩我啦，Jan』我會繼續玩落去，因為有個人一直都玩唔到。有票喺手嘅歌迷，係玩一個人玩足十年。」林海峰說：「張敬軒示範咗畀大家睇「有玩未為輸」，佢係繼續玩，好認真咁玩，係十年、足足十年，『十年磨一劍』，叱咤歷史性時刻，重要嘅嘢講三次，『我最喜愛的男歌手』，張敬軒、張敬軒、張敬軒！」宣布張敬軒獲得「我最喜愛的男歌手」，而張敬軒則在台下顯得一臉不可置信。

張敬軒感嘆時代變遷

張敬軒上台時立即大喊：「多謝大家！」之後張敬軒表示：「參加咗叱咤咁多年，每年trend都變緊，我哋生活環境、時代都變緊。」張敬軒多謝樂迷投票後說：「我好少喺公開場合多謝佢哋，好多謝MIRROR嘅fans，因為好多IG Followers佢哋icon都係MIRROR啲樣。其實你問我，而家廣東歌喺亞洲樂壇持份額已經係好少，每年我哋為咗氣氛熾熱啲，有好多唔同新聞，但我覺得每一個歌手都係as one，都係一家人，我哋一齊做好我哋香港小小嘅樂壇。」

張敬軒隨後繼續多謝歌迷、網友：「時代嘅變遷，令我覺得同我同年入行嘅歌手已經一個比一個少，到而家全部都係新面孔。對於我嚟講，惟有對呢個行業、世界保持強烈好奇心。」身為廣州人的張敬軒亦好多謝香港，同時又多謝連登仔，指自己在迷惘時，亦會上網睇意見。