溫碧霞專訪|憶反叛期沾煙酒逃學落D睹好友吸毒斃命 17歲拍牀戲感委屈:諗返好傻
更新時間:10:00 2023-09-20
發佈時間:10:00 2023-09-20

由溫碧霞(Irene)監製的傳記式電影《我們的十八歲》將於本月上映,故事以她一生的經歷真人真事改編,講述80年代家境貧困的女主角Elaine(林千渟飾)與好友李羨英(楊偲泳飾)踏入娛樂圈的心路歷程,當中不乏裸露、牀戲、食煙飲酒等鏡頭。溫碧霞坦言拍攝期間勾起不少回憶,如今回望反叛時期的自己,她笑稱:「我覺得自己幾有Character,細個覺得自己好有性格,天不怕地不怕,咁細個就自己出去闖天地,好型,諗番轉頭我唔曳就唔會入呢行。」

【相關閱讀】:12個TVB經典舞小姐!周海媚最驚艷靚過《一舞傾城》 溫碧霞吊帶小背心上陣

【點擊睇溫碧霞成長歷程】:

56歲溫碧霞於2000年下嫁富商何祖光,婚後在內地收養被遺棄於火車站的何國倫(Xavier),一家三口住在逾2,000呎的清水灣海景豪宅,生活幸福無憂。然而,出身清貧的溫碧霞前半生卻歷盡艱辛,她自幼在調景嶺成長,一家十口擠在數百呎的木屋過活,屋企一磚一瓦也是爸爸親手建立,每逢返風落雨瓦頂還會漏水,5歲時更因經濟拮据差點被媽咪賣走,雖然日子艱苦,但她稱仍充滿快樂回憶:「屋企冇乜錢,所以細個成日食豉油撈飯,仲有罐頭豆、豆豉鯪魚、煎雞蛋,有雞食嗰日或者媽咪買包栗子畀你已經好開心,就因為咁窮,你經歷過捱過,愈難得到先更加珍惜擁有嘅嘢。」

愈管愈反叛

八兄弟姊妹中排最尾的溫碧霞,從小獲哥哥姐姐錫到燶,惜曾任軍官的父親管教嚴謹,令好勝的她愈大愈反叛:「父母唔太了解我想要咩,就係要我讀書、唔准出夜街、唔准咁細個拍拖,所以我細個成日覺得缺乏愛,連男同學打嚟都唔畀我聽,爸爸會即刻掛線。」不過,溫碧霞直言:「如果我要做一樣嘢就一定要做到,冇人可以阻止到我,就算話我做錯都唔理!」結果14歲無心向學,逃學落「Noon D(午場Disco)」飲酒食煙,未料遇上不良少年,終給她一場震撼教育:「嗰時落Disco個個都叫你試吓丸仔,我唔敢,但我朋友食咗兩粒、飲咗好多酒,我見到佢嘔白泡,即刻Call十字車,最後OD(藥物過量)死咗,所以我好細個就知道呢樣嘢一定唔可以掂。」

直到15歲被媽咪狠摑後離家出走,溫碧霞在街上獲資深電影人黎大煒和文雋發掘,並憑處女作《靚妹仔》提名金像獎最有前途新人,自此愛上演戲的她決心成為一名出色的演員,1984年夥拍劉德華主演《停不了的愛》,當時她更與劉德華、吳孟達上演牀戲。提到《我》片女主角被迫剝衫演出,現實中可試過不情願地接下某些工作?溫碧霞不諱言:「嗰時17歲未成年,有啲好激嘅場面唔識Handle,會緊張同唔敢做,拍完好似好委屈咁,但大個咗就知係拍戲咋嘛。」

無悔赤裸演出

為突破自我,1996年她還於三級片《驚變》露點演出,惜尺度過大惹來爭議,加上父親離世,大受打擊的溫碧霞一度心淡,甚至逃到外國玩失蹤,幸失意時遇上丈夫何祖光:「而家望番轉頭覺得自己好傻,做咩要為人哋講嘅嘢令到自己咁唔開心?而家就真係I don’t care,我自己知道自己做咩,唔需要Please佢哋,所以我從來冇後悔過,過往每部作品我都係好鍾意先拍,對我嚟講性感演出係一個突破,因為電影、人體都係一個藝術。」

對於任職銀行主管的何祖光家世顯赫,爺爺乃國民黨名將何應欽,有指夫家介意她拍過艷片,溫碧霞坦承丈夫曾背負壓力:「我同佢係兩個世界嘅人,可能會有啲流言蜚語,朋友或家人間會對我有啲誤解,形成曾經有段時間差啲想同佢分手,我話如果你咁介意人哋講咩係冇意思,咁我聽到都唔開心架嘛,但就因為嗰時分開咗一、兩個禮拜,佢先向我求婚,因為佢發現最愛都係我,愛可以打破一切。」

 

採訪:黎寶倫
攝影:朱偉彥
化妝及髮型:Sharonlam107
場地:The Vault@中環藝穗會

 

【其他文章】:

56歲溫碧霞內地商演大露背疑真空上陣露半球 側身照瘋傳網民熱討:明星必須裸露?

溫碧霞晒舊照18歲包包面可愛樣曝光 凍齡狀態不輸兩人氣新女

56歲溫碧霞展示最真實身材驚見胸部有三點! 凍齡女神比堅尼fit爆遊峇里

《星島頭條》APP經已推出最新版本,請立即更新,瀏覽更精彩內容:https://bit.ly/3yLrgYZ