劉美君80歲餅印母親患腦膜瘤高爾夫球咁大粒手術成功勁感動

更新時間：06:00 2022-09-13 HKT
發佈時間：06:00 2022-09-13 HKT

57歲的劉美君曾於18年擔任首季《全民造星》導師，本來第二季都可以冧莊，但因為政治言論辣㷫網民，最終放棄唔做導師由陳潔靈頂上，更遠走加拿大湊孫，及暫別社交平台一段時間。

貴為瑜伽高手的劉美君經常分享各類運動及瑜伽短片，以近60之齡，全身輕鋼鐵身形，有老鼠仔有腹肌，明顯用心經營，係厲害嘅。
中秋節當日，好少講家事的劉美君，在社交平台公告佢媽媽幾個星期前被診斷患有腦膜瘤，個瘤大約一個高爾夫球咁大。「呢個簡直係一場旋風，我哋瘋狂哋擔心，因為唔知道個瘤係良性定惡性。」好彩得到Dr Toyota嘅頂級治療，佢哋取得勝利，打咗一場漂亮嘅仗。

劉美君仲有感而發，覺得呢件事令佢變得更堅強。「我唔知道原來我可以一直保持冷靜同鎮定，我唔知道原來我見到血係唔會暈，我清理咗媽媽嘅傷口，幫佢沖涼......。」

而中秋節係劉母嘅80歲生日，亦係劉美君囝囝嘅牛一，睇相兩母女好似樣，劉母個樣仲一啲都唔似80歲添。最後劉美君好多謝朋友及網友嘅祝福，仲話媽媽喺屋企休養中，復原得好好，因為有三個不同嘅治療師及一名護士協助佢，更指媽媽每日瞓到好似BB咁，胃口仲好似馬一樣咁勁。