祖馬龍心水│「祝願」繼續放返

更新時間：19:02 2024-11-30 HKT
發佈時間：19:02 2024-11-30 HKT

祖馬龍終於見證到賽事嘅公平、公正、公開。呢次賽事，日前由小弟去為馬匹排位抽籤，假如各位馬主抽到內檔，不妨過嚟多謝祖馬龍吹吓水；若果抽到外檔就問返馬會，絕對唔關祖馬龍嘅事，因為呢個抽檔程序保證公平公正。禮拜四嗰日，真係倒塔咁早就起身，去到馬會總部大樓去幫每一場賽事抽檔排位。不過建基於有潛在利益衝突，有兩場賽事並非筆者抽籤，需要由受薪董事代抽。幸運地，該兩場賽事有關我嘅兩匹賽駒都抽到好檔，希望呢個賽日祖馬龍可以延續幸運，拉今季第五次頭馬。

撇開主觀因素，祖馬龍呢鋪準備繼續跟進「祝願」。上鋪總場次155去馬，「祝願」捐閘偷跑，重新入閘後，早段搶前由頭放到尾。呢鋪排十三檔雖然又係劣檔，但希望同上鋪一樣有夢幻際遇，同樣由頭放到尾。佢體重唔夠一千磅，馬仔細細但韌力十足。心水投注策略係「祝願」獨贏，另外加埋「遙遙領先」買位置Q。

第八場：6堅闖、10旌鷹、9競駿光輝
第十場：3祝願、4遙遙領先、5風雲武士

↓立即下載星島頭條App↓