亨利拆局│練馬師王吼告東尼

更新時間:02:00 2023-03-22
發佈時間:02:00 2023-03-22

大賽過後回歸平淡,今次谷戰雖未至於戲碼乏味,不過各倉布陣偏向平均,預期練馬師王可能開出低分數,若果三十分為中位數,我估開下盤機會較高。翻查告東尼近期谷戰成績,二月一日奪十八分已是本年佳作,馬房攻勢明顯偏重於沙田,博佢在谷草封王風險極高。不過,今次東廄集中幾匹路程專家同晚列陣,似乎有心食大茶飯,希望佢做齣好戲。

第三場「浪茄仔」上仗初跑谷草即大變身,沿二疊前疊都幾乎頂到尾,頭馬「育成精彩」再出再贏,甚至被佢拋離的「不可擋」接戰亦補中,本身一席亞軍盡顯水準,初步判斷窄場最合腳法。今次排二檔非常好跑,除非內疊出現嚴重鴛鴦地,否則應坐位望贏。 第二場「正氣青驅」上仗直路衝刺走S型,走勢尚嫌生嫩,今次排內檔會較易發揮,希望能補中。

第六場「爆谷」上仗三疊轉彎亦入Q,皆因谷A未算太蝕,今次排劣檔非常惡搞,希望奇迹出現。第七場「加州一寶」上仗由貼欄馬串Q,本身蝕二疊得季算不過不失,今次貪佢配布文,有望提升名次。第八場「柏林探戈」前仗頭兩段步速太慢,加上孭重磅非常難追,今次減十磅有轉機。

目標:告東尼

賠率:4.0

立即下載 | 全新《星島頭條》APP : https://bit.ly/3yLrgYZ