亨利拆局│練馬師王吼黎昭昇

更新時間：02:00 2023-03-11 HKT
發佈時間：02:00 2023-03-11 HKT

留意沙田賽事的練馬師王，最高分紀錄保持者是賀賢的五十四分，最低分紀錄則是十月十六日的蔡約翰，起孖奪廿四分已經封王，上下差距可以極闊。今次田草十場賽事，並無一個馬房的布陣屬一面倒強勢，預期練馬師王很大機會開出低分數，隨時起孖已夠贏。今期黎昭昇只出馬四匹，實際得三駒有競爭力，就博佢起孖甚至中三元稱王。

第一場「亞洲力量」近兩仗採用後追跑法獲一冠一亞，勝在演出穩定，缺點則是跑法被動忌慢步速。不過今次排五檔兼配潘頓，早段未必會留太後，既然上仗轉彎蝕位都可入Q，今次若能移入二疊居中，就有機會補中。第二場「激光天下」上仗初出即勝已露鋒芒，頭兩段造快步速亦彈離輕勝，仍居四班應無阻力。今仗唯一顧忌是孭頂磅，慶幸排四檔令早段毋須過度用力，當弗馬仍有再捷機會。

第四場「喜報圍家」暫無養眼走勢，兩戰千四亦輸遠，不過兩次都排大外檔，希望今次抽七檔有奇迹出現。第八場「忠肝義膽」上仗沿途貼欄慳腳程，但直路繼續貼欄衝刺則應有影響，今次降班即改配田泰安，有助發揮後勁。

目標：黎昭昇

賠率：10

立即下載 | 全新《星島頭條》APP : https://bit.ly/3yLrgYZ