KellyChu - 港迪士尼巨型聖誕樹亮燈 全新無人機圖案表演登場 | Executive日記
發佈時間:02:00 2026-11-17 HKT
香港天氣漸涼,聖誕節氣氛亦開始濃厚。香港迪士尼樂園即日起以「A Disney Christmas」為主題,推出系列聖誕活動;其中園內已豎起一棵巨型聖誕樹,到晚上會亮起燦爛燈光;之後聖誕樹上空,會上演全新無人機表演,小白、小熊維尼、高飛和Duffy等,紛紛戴上聖誕帽一一亮相。Kelly昨日有幸親身到場觀賞,感覺已經提前過歡樂聖誕,大家都快啲入園!
想感受濃厚聖誕氣氛,香港迪士尼一定係不二之選。Kelly昨日入園,發現美國小鎮大街,已經豎起一棵巨型聖誕樹;而即日起到明年1月3日,每晚約6點半左右,都有聖誕樹亮燈儀式;入夜後,隨住人造雪花徐徐飄落,仲有溫暖嘅聖誕樂曲,小鎮燈光逐漸亮起,夜空上無人機不斷變換造型,小白、小熊維尼、高飛和Duffy等,紛紛戴上聖誕帽一一亮相,引來遊客陣陣驚呼;而穿上聖誕造型嘅高飛,亦會聯同聖誕合唱團,帶領遊客許願,喺燈光和無人機襯托下,同大家共度難忘嘅時刻。
同時,Frozen小木屋區將於本周四推出新遊戲「阿德爾雪球彩蛋」,皇家魔法大使會講解市集故事,遊客要依照提示念出咒語、做出魔法手勢啟動抽獎,工作人員會以北歐語「magi」、「olaf」為大家打氣,等大家沉浸式感受魔法互動嘅樂趣。另外,周四起,奇妙夢想城堡前會加推「米奇與好友聖誕驚喜」日間舞台表演,米奇、米妮、史迪仔、高飛等角色登場,伴隨音樂歡笑,喺飄雪效果下,同大家分享聖誕故事。
「魔雪奇緣世界」園區亦加入唔少全新聖誕環節,其中新開設嘅冬日市集,會推出多款限定甜品,包括小雪人熱朱古力、雪花曲奇、小白軟雪糕等;還有豐富節慶紀念品,包括針織款《魔雪奇緣》毛公仔、北歐風針織帽、圍巾、襪子,及聖誕玻璃掛飾等,一應俱全。
另外,樂園亦推出限時「雙重暢玩」門票優惠,可以879元喺明年3月31日前入場2次,並附有餐飲禮券!
KellyChu




















