胡慧沖 - 行行吓街被人「捉」上車？ | 筆泰沖動

更新時間：02:00 2026-11-13 HKT
發佈時間：02:00 2026-11-13 HKT

　　早前喺曼谷街頭行行吓，突然有人叫住我，仲邀請我上車影相！當時真係一頭霧水，心諗：「究竟搞乜鬼？」原來呢架車竟然係一間流動攝影室，工作人員幫我影咗張黑白大頭相。影完之後，我亦冇特別放喺心上。點知事隔幾個月，竟然發現自己張相成為大型藝術展覽嘅一部分，仲喺曼谷全新創意地標Cloud 11裏面出現！

　　原來呢個名為「Thailand Creative Archive」嘅展覽，係由國際知名法國藝術家JR創辦嘅Inside Out Project，亦係呢個全球參與式藝術計劃喺東南亞最大型展出。整個計劃搜集咗超過2,500張人物肖像，涵蓋藝術、電影、音樂、設計、時裝等唔同創意行業，包括知名人物，以及平日默默耕耘嘅幕後工作者。

　　其實整件事最有意義嘅地方，並唔係我張相可以喺商場展出，而係透過一張張普通人嘅面孔，帶出一個重要訊息：每個人都有自己嘅故事，每個人都可以係藝術嘅一部分。

　　創意產業唔單止屬於明星或者藝術家，更加屬於每一位默默付出嘅參與者。當2,500張面孔集合起來，就成為一幅代表泰國創意力量嘅巨型藝術作品。由街頭一張意想不到嘅照片，到成為國際藝術計劃嘅一小部分，對我嚟講，確實係一次非常特別又難忘嘅經歷！

　　展覽由2026年11月11日至2027年1月，於曼谷Sukhumvit Road、BTS Punnawithi站附近嘅Cloud 11舉行。有機會大家不妨去睇吓，順便幫我搵吓張相喺邊度！

胡慧沖