胡慧冲 - 行行吓街被人「捉」上车？ | 笔泰冲动

更新时间：02:00 2026-11-13 HKT
发布时间：02:00 2026-11-13 HKT

　　早前喺曼谷街头行行吓，突然有人叫住我，仲邀请我上车影相！当时真系一头雾水，心谂：「究竟搞乜鬼？」原来呢架车竟然系一间流动摄影室，工作人员帮我影咗张黑白大头相。影完之后，我亦冇特别放喺心上。点知事隔几个月，竟然发现自己张相成为大型艺术展览嘅一部分，仲喺曼谷全新创意地标Cloud 11里面出现！

　　原来呢个名为「Thailand Creative Archive」嘅展览，系由国际知名法国艺术家JR创办嘅Inside Out Project，亦系呢个全球参与式艺术计划喺东南亚最大型展出。整个计划搜集咗超过2,500张人物肖像，涵盖艺术、电影、音乐、设计、时装等唔同创意行业，包括知名人物，以及平日默默耕耘嘅幕后工作者。

　　其实整件事最有意义嘅地方，并唔系我张相可以喺商场展出，而系透过一张张普通人嘅面孔，带出一个重要讯息：每个人都有自己嘅故事，每个人都可以系艺术嘅一部分。

　　创意产业唔单止属于明星或者艺术家，更加属于每一位默默付出嘅参与者。当2,500张面孔集合起来，就成为一幅代表泰国创意力量嘅巨型艺术作品。由街头一张意想不到嘅照片，到成为国际艺术计划嘅一小部分，对我嚟讲，确实系一次非常特别又难忘嘅经历！

　　展览由2026年11月11日至2027年1月，于曼谷Sukhumvit Road、BTS Punnawithi站附近嘅Cloud 11举行。有机会大家不妨去睇吓，顺便帮我揾吓张相喺边度！

胡慧冲