KellyChu - 187件清宮瑰寶穿越四季御貓文創系列搶攻錢包港故宮館新展覽「清宮四時」登場 | Executive日記

更新時間：02:00 2026-11-04 HKT
發佈時間：02:00 2026-11-04 HKT

香港故宮文化博物館又有新搞作喇！佢哋今次聯同故宮博物院推出全新大展「清宮四時－－宮廷生活與文化」，帶大家跟住清代皇帝度過一年四季。展期由今日起一路去到2028年11月3日，帶嚟187件北京故宮嘅瑰寶，展期咁長，想幾時睇就幾時睇！但全新宮廷御貓文創系列就應該會好搶手喇，貓奴們記得把握機會購買。

　　今次展覽以清代宮廷嘅春夏秋冬做主軸，每3個月仲會輪換部分展品。Kelly入場即見重點文物「渾天儀」，原來清廷睇重天文科學，每年都會喺午門舉行頒發曆書典禮，而渾天儀就象徵住「君權神授」。

　　四季各有亮點。春季必睇《胤禛耕織圖》，雍正皇帝化身農夫落田耕種。夏季除咗睇皇帝點樣避暑同邊疆民族外交，亦唔好錯過欣賞「轉鴨荷花缸鐘」，呢件文物結合咗中國琺瑯工藝同法國音樂機關，啟動時伴隨音樂，三朵荷花慢慢綻放，入面嘅童子同仙猿仲會向西王母跪拜獻桃，個錶盤仍然可以運作㗎！

　　秋季就要跟住皇帝去「木蘭秋獮」，見識下皇家狩獵嘅浩大場面。而冬季一幅3米高、3.6米長嘅超巨型「歲朝圖座屏」是為國家一級文物，展現濃厚嘅賀歲氣氛。

　　講到最令Kelly興奮嘅部分，上次埃及展啲貓貓產品帶起熱潮，今次故宮推出全新文創系列「宮廷御貓：四時珍寶錄」，四大全新角色「天子貓咪」、「妃子貓咪」、「將軍貓咪」同「黑貓探險家」萌爆登場，即刻冧爆Kelly！啲貓貓主子仲會穿越入《胤禛耕織圖》，又會化身成絲巾、拖鞋、環保袋掛飾等一系列又得意又實用嘅周邊，大家都可以揀返樣心頭好！

KellyChu