胡慧沖 - 出入境泰國徵費存變數 | 筆泰沖動

更新時間：02:00 2026-10-16 HKT
發佈時間：02:00 2026-10-16 HKT

　　旅客未來出入境泰國要徵收2,570銖？原來仲有變數！

　　早前網上瘋傳，泰國政府準備向遊客收取多項費用，七除八扣，每個人竟然要畀2,570泰銖（約602港元）！消息一出，唔少網民大叫吃不消，甚至話以後唔再去泰國旅行。

　　其實呢條數點計出嚟？包括已經實施、包含喺機票價格內嘅1,120銖機場服務費，以及尚未落實嘅450銖入境費同1,000銖出境稅。三項加埋，剛好2,570銖。

　　不過，最新消息似乎有轉機！泰國財政部近日解釋，政府正考慮在徵收入境費與出境稅之間「二揀一」，避免重複收費。換言之，未必需要入境先收450銖，離境又收1,000銖。至於早前傳出最高收5,000銖，亦只係法律草案設定嘅上限，並非實際收費。

　　財政部認為1,000銖係較合理水平，日後甚至可能直接計入機票價格。但要強調，以上仍然處於研究及諮詢階段，並未正式實施。所以，之前2,570銖並非計錯，而係將所有可能收費一次過加埋。

　　究竟最後收450銖、1,000銖，抑或政策再有改變？仍然要等政府拍板。

　　對遊客而言，當然最好就係唔使再加錢！畢竟泰國吸引遊客嘅其中一個原因，就係價錢相對親民，唔係嗎？

胡慧沖