KellyChu - 逾60義工協力基層市民享美饌 6大廚會聯手行善沙田筵開36席送暖 | Executive日記

更新時間：02:00 2026-10-07 HKT
發佈時間：02:00 2026-10-07 HKT

　　城中一班中菜名廚，人人廚藝了得，仲有一顆善心，服務基層市民。由香港中廚師協會、中國香港女廚師協會、群生飲食技術人員協會、惺惺同學會、愛心義廚行，以及酒店旅遊及廚藝學院校友會共6個組織，一齊合力籌辦嘅「盛世家國情．攜手共融夜」慈善晚宴，喺10月5日晚鄰舍輔導會沙田怡欣山莊圓滿舉行。Kelly見一班名廚悉心烹煮美食，加上一批義工協助，為基層市民送上關懷同溫暖。

　　呢次晚宴現場氣氛熱烈，嘉賓滿堂，洋溢愛心與同樂嘅氛圍。一眾廚師放下日常工作，親自落場施展渾身解數，以精湛廚藝為在場人士烹調佳餚。另有超過60位義工到場打點碗筷枱櫈等，合力安排36圍慈善宴，人人食得開心，場面好熱鬧！

　　香港中廚師協會會長江肇祺話，今次活動係歷來最多義工嘅一次，召集咁多人好唔容易，但一聲號召，大家就積極響應。佢強調，烹調佳餚固然要有愛心，人與人之間嘅關懷同樣重要。呢次菜餚均由廚師用心烹製，希望市民盡情享受呢場慈善晚宴。

　　其他各大會長致辭時一致表示，感謝中廚師協會牽頭舉辦此次活動，讓大家濟濟一堂，共度一個愉快嘅晚上。大家亦期望這項別具意義嘅義工活動未來能持續舉辦。當晚，女廚師協會及《中年好聲音4》嘅可嵐亦特別獻上兩首金曲，為大家助興。Kelly覺得，是次慈善晚宴不僅展現咗飲食業界團結一致嘅力量，更彰顯業界關懷社會、服務社群嘅核心價值。

KellyChu