KellyChu - 電磁波靈感造耳仔新平台推5大主題節目港台AI吉祥物「電電」可愛登場 | Executive日記

更新時間：02:00 2026-10-06 HKT
發佈時間：02:00 2026-10-06 HKT

　　作為全港歷史最悠久嘅公共廣播機構，香港電台力求創新，推出全新新媒體平台同吉祥物「電電」！新平台就以5大主題製作一系列節目，帶大家認識香港嘅唔同面貌，好有心思。至於吉祥物「電電」，原來係由AI生成，而耳仔上面嘅圖案，靈感源於廣播服務依賴嘅電磁波。見到「電電」咁可愛，Kelly已經俾佢俘虜！

　　新平台特製內容相當豐富，涵蓋5大主題，包括發掘社區暖心故事嘅《Wa~好香港》；以輕鬆方式呈現香港可愛一面嘅《Wa~好識答》；以及介紹本地特色活動、文化景點同地道美食嘅《Wa~好去處》，啱晒鍾意發掘香港好去處嘅Kelly！

　　精彩節目陸續有嚟，港台亦會推出《Wa~好經典》，運用AI技術修復港台珍貴經典檔案，以新舊對比呈現香港發展歷程，相信會勾起唔少人嘅集體回憶；稍後登場嘅《Wa~好好戲》就以AI、動漫、真人混合方式製作線上短劇，唔同年齡層都啱睇！新媒體平台已經登陸YouTube、Facebook同Instagram，大家記得密切留意喇！

　　港台表示，新平台以深入淺出嘅內容，宣傳香港同傳揚香港精神，落實今年《施政報告》提出，支持港台加強應用AI及新媒體，提升製作效率，說好國家及香港故事。廣播處長關婉儀話，期望透過新平台同「電電」，注入更強嘅活力同親和力，吸引更廣泛、特別係年輕一代嘅觀眾收聽同收睇港台製作。

KellyChu