KellyChu - 电磁波灵感造耳仔新平台推5大主题节目港台AI吉祥物「电电」可爱登场 | Executive日记

更新时间：02:00 2026-10-06 HKT
发布时间：02:00 2026-10-06 HKT

　　作为全港历史最悠久嘅公共广播机构，香港电台力求创新，推出全新新媒体平台同吉祥物「电电」！新平台就以5大主题制作一系列节目，带大家认识香港嘅唔同面貌，好有心思。至于吉祥物「电电」，原来系由AI生成，而耳仔上面嘅图案，灵感源于广播服务依赖嘅电磁波。见到「电电」咁可爱，Kelly已经俾佢俘虏！

　　新平台特制内容相当丰富，涵盖5大主题，包括发掘社区暖心故事嘅《Wa~好香港》；以轻松方式呈现香港可爱一面嘅《Wa~好识答》；以及介绍本地特色活动、文化景点同地道美食嘅《Wa~好去处》，啱晒钟意发掘香港好去处嘅Kelly！

　　精彩节目陆续有嚟，港台亦会推出《Wa~好经典》，运用AI技术修复港台珍贵经典档案，以新旧对比呈现香港发展历程，相信会勾起唔少人嘅集体回忆；稍后登场嘅《Wa~好好戏》就以AI、动漫、真人混合方式制作线上短剧，唔同年龄层都啱睇！新媒体平台已经登陆YouTube、Facebook同Instagram，大家记得密切留意喇！

　　港台表示，新平台以深入浅出嘅内容，宣传香港同传扬香港精神，落实今年《施政报告》提出，支持港台加强应用AI及新媒体，提升制作效率，说好国家及香港故事。广播处长关婉仪话，期望透过新平台同「电电」，注入更强嘅活力同亲和力，吸引更广泛、特别系年轻一代嘅观众收听同收睇港台制作。

KellyChu