胡慧沖 - 風雨過後 | 筆泰沖動

更新時間：02:00 2026-10-02 HKT
發佈時間：02:00 2026-10-02 HKT

　　呢幾日大家睇到曼谷水浸嘅新聞，相信唔少準備嚟泰國旅行嘅朋友都會有少少擔心，甚至有人問我：「𠵱家仲適唔適合去曼谷？」

　　其實今次水浸雖然有部分地區情況比較嚴重，但並唔代表成個曼谷都浸晒。受影響比較明顯嘅，主要係某啲低窪地區、住宅區，或者排水比較慢嘅地方。對一般遊客嚟講，最常去嘅市中心旅遊區，例如Siam、CentralWorld、Pratunam、Asok、Sukhumvit、唐人街，以及湄南河一帶主要旅遊地點，基本上都冇受到太大影響，日常運作亦大致正常。

　　𠵱家情況更加令人放心，因為之前連日嘅大雨已經停咗，呢幾日曼谷反而日日都出猛烈太陽，天氣同之前已經完全唔同。部分曾經出現水浸嘅地方，積水亦逐步退去，生活慢慢回復正常。

　　所以如果大家嚟曼谷，純粹係去一般遊客區、商場、夜市、餐廳或者市中心景點，其實真係唔需要太過擔心。當然，出發之前留意一下天氣同交通資訊始終係好事，但亦唔需要因為網上幾張嚴重水浸相片，就以為成個曼谷都變成一片汪洋。

　　旅行最重要係睇實際情況，而唔係自己嚇自己。至少現時嘅曼谷市中心，依然照常生活、照常塞車、照常熱到出汗，遊客亦一樣可以繼續食、買、玩。

胡慧沖