胡慧冲 - 风雨过后 | 笔泰冲动

更新时间：02:00 2026-10-02 HKT
发布时间：02:00 2026-10-02 HKT

　　呢几日大家睇到曼谷水浸嘅新闻，相信唔少准备嚟泰国旅行嘅朋友都会有少少担心，甚至有人问我：「𠵱家仲适唔适合去曼谷？」

　　其实今次水浸虽然有部分地区情况比较严重，但并唔代表成个曼谷都浸晒。受影响比较明显嘅，主要系某啲低洼地区、住宅区，或者排水比较慢嘅地方。对一般游客嚟讲，最常去嘅市中心旅游区，例如Siam、CentralWorld、Pratunam、Asok、Sukhumvit、唐人街，以及湄南河一带主要旅游地点，基本上都冇受到太大影响，日常运作亦大致正常。

　　𠵱家情况更加令人放心，因为之前连日嘅大雨已经停咗，呢几日曼谷反而日日都出猛烈太阳，天气同之前已经完全唔同。部分曾经出现水浸嘅地方，积水亦逐步退去，生活慢慢回复正常。

　　所以如果大家嚟曼谷，纯粹系去一般游客区、商场、夜市、餐厅或者市中心景点，其实真系唔需要太过担心。当然，出发之前留意一下天气同交通资讯始终系好事，但亦唔需要因为网上几张严重水浸相片，就以为成个曼谷都变成一片汪洋。

　　旅行最重要系睇实际情况，而唔系自己吓自己。至少现时嘅曼谷市中心，依然照常生活、照常塞车、照常热到出汗，游客亦一样可以继续食、买、玩。

胡慧冲