KellyChu - 港故宮館「清宮製造與當代設計」展揭幕 157件珍寶彰顯皇帝品味 | Executive日記

更新時間：02:00 2026-09-30 HKT
發佈時間：02:00 2026-09-30 HKT

　　香港故宮文化博物館與故宮博物院聯合主辦嘅「清宮製造與當代設計」展覽，今日起正式開放，157件巧奪天工嘅故宮珍藏，包括14件國家一級文物，會喺展廳亮相，帶觀眾一探清代皇室御用機構「造辦處」嘅運作與美學。清代康熙、雍正及乾隆三位皇帝，有唔同嘅審美同品味追求，令造辦處製作嘅器物，帶有鮮明時代風格，可以話皇帝就係嗰位「首席設計師」，亦體現出清宮對審美與工藝嘅極致追求。Kelly大力推薦大家入場鑒賞！

　　造辦處係清代專門為皇室製作、修繕各種宮廷器物同陳設品嘅機構，下設數十個專業作坊，分工精細，匯聚全國最頂尖嘅能工巧匠，從東北、南海、西域等地蒐集珍貴材料，經由琺瑯、漆器、玉雕、鐘錶等工種嘅匠人之手，變成兼具日用與美學價值嘅精巧器物。

　　康熙鍾意貼近大自然、富有生命力嘅嘢，所以器物呈現渾厚大氣嘅風格；雍正偏愛文雅素淨嘅氣質，做出嚟嘅嘢精細秀氣；而乾隆則鍾情新奇事物，追求華麗、色彩豐富嘅視覺效果。例如鹿角椅，主體結構由康熙帝親手獵獲嘅鹿角製成，背板刻有乾隆帝詩作，歌詠祖父康熙帝獵鹿、製椅嘅過程。

　　海水雲龍福壽紋桃式盒，係雍正帝萬壽節特製，以純金為胎，表面用多塊紅珊瑚嚴絲合縫粘接；蓋飾有蝙蝠拱壽字，並有九條龍穿躍於滿琢嘅雲紋之中。而畫琺瑯八棱開光山水花鳥圖提樑壺，原型係西洋銀暖壺，乾隆帝傳旨喺把手添上難度極高嘅金星玻璃，最終成為中西合璧嘅琺瑯精品。

　　除咗近距離觀賞到逾百件清宮傳世珍品，觀眾仲可以透過展廳內嘅多媒體互動測驗，發掘最適合自己審美嘅宮廷風格。另外，展覽更展出匠役出入造辦處須佩戴嘅「工作證」，上面標注咗佢哋嘅年歲及樣貌特徵。觀眾亦可以通過多媒體互動環節，製作屬於自己嘅「造辦處『宮』作證」。

KellyChu