KellyChu - 哈囉喂全園祭呈獻獨特視覺效果海洋公園聯乘王嘉爾IP打造驚悚鬼屋 | Executive日記

更新時間：02:00 2026-09-25 HKT
發佈時間：02:00 2026-09-25 HKT

　　海洋公園哈囉喂全園祭今年大升級，除咗自家哈囉喂IP「Voodoo Boo」回歸，仲突破聯乘由音樂人王嘉爾主理及擔任創意總監嘅人氣原創IP「Under the Castle」，以及港產恐怖片《陰陽路之棺材仔》，以「詭魅墓會」為主題打造四大驚嚇鬼屋，融合感官刺激、獨特視覺效果，令人又驚又想玩。

　　Kelly齋睇預告片，已經感受到今次嘅驚嚇程度不容小覷，走入「惡靈遊樂場」係虛實難分嘅扭曲惡靈世界，「詭域瘋人院」讓參加者化身調查員，靠超自然頻率、慘叫同囈語推進劇情，探險氣氛max！「陰陽路之棺材仔」重現荒廢圍村、紅衣女鬼遇害現場同棺材祭壇，全方位還原電影驚慄場景。「Under the Castle驚嚇體驗」由迷霧古堡、綠色水晶詛咒、詭異鏡像、活死人同夢魘異形，幻化循環逃生劇情。

　　海洋公園董事局主席龐建貽表示，今年哈囉喂與兩大IP合作，有信心可以吸引更多市民和遊客入場，對門票銷情有信心，加上國慶黃金周期間將有不少內地旅客來港，而哈囉喂亦是香港較獨特嘅旅遊體驗。

　　海洋公園推出多款期間限定哈囉喂商品，有化身成巫師嘅貓頭鷹、裝喺南瓜盅嘅黑色貓咪，同埋換上應節新裝嘅的骰熊貓仔，趣致可愛。各款哈囉喂餐點亦好有心思，其中通靈拼盤嘅主菜黑咖哩見都未見過，味道似日式咖哩，甜甜地。嘩鬼奶凍夠盞鬼；極品鹹豬手用意大利風乾火腿和麵包扮木乃伊手，都有幾分似！配合園方今年哈囉喂主題嘅「黑芝麻慌碑」，墓園造型甜品，就最有特色。海洋公園亦續推猛男經濟，請來由8位型格OPPA組成限定男團「Demoon King」演出。

KellyChu