KellyChu - 99元套餐歎鮑魚豬手5種享受鯉魚門懷舊茶座即日做鮮芒布甸「正斗」 | Executive日記

更新時間：02:00 2026-09-23 HKT
發佈時間：02:00 2026-09-23 HKT

朋友知我愛吃甜品，話帶我去鯉魚門。吓，唔係去食海鮮咩？為解開疑團，話咁快，坐一程的士就到鯉魚門大牌坊，走入海傍大道中，經過迂迴通道，兩旁無數間海鮮檔，終於到達目的地－－銀龍咖啡茶座。真的不枉此行，品嘗到全城最美味的芒果布甸，沒有之一。

　　推開店門，見紙皮石地同一排排木架座位，好似返咗上世紀60年代，好有集體回憶嘅感覺。打開餐牌，不見碟頭炒粉麵飯，只有輕食，反映店方專注於此。我和朋友搵食目標明確，要吃芒果布甸，但見「皇牌套餐」宣傳字句：「一個價錢，五種享受」，只收99元，就來兩客吧。清酒啖豉油冰鎮鮑魚，清新日系feel，umami滿滿；牛油蛋白西多士，餡料竟是淡口腐乳，有芝士feel，加煉奶之後鹹甜交織，過癮又夠味，好夾。南乳炆豬手亦惹味，而奶茶也很到家。

　　怎知精彩在後頭——甜點「芒果后」，人手即日做鮮芒果布甸，入口即化，果甜奶香，我味蕾都似在笑，心中開心。朋友說：「係咪無介紹錯？應該係香港最正芒果布甸之一。」我即刻反對，「係全港最正斗最好味之作，沒有之一。」

　　單歎這個「芒果后」，就值得專程入鯉魚門一趟，又或者吃完海鮮過來吃，也是無以上之的享受。但「皇牌套餐」五樣美食才收99元，除開不用20元一樣，抵到無朋友，知慳識食的Kelly，非常強烈建議大家食個套餐。

KellyChu