KellyChu - 港芭進駐西九演藝中心 | Executive日記

更新時間：02:00 2026-09-22 HKT
發佈時間：02:00 2026-09-22 HKT

　　西九演藝及香港芭蕾舞團宣布，港芭將進駐西九演藝中心，成為中心首個駐場嘅藝團同策略文化夥伴。港芭將定期喺中心上演節目及活動，亦會獲分配逾1000平方米嘅專屬空間，包括舞蹈排練室、物理治療室、辦公室等設施。港芭將於明年9月至10月，上演2026/27舞季重磅製作嘅全新芭蕾鉅作《李小龍：香港傳奇》，作為西九演藝中心嘅開幕節目之一，亦係作品嘅世界首演。

　　籌備經年嘅舞劇《李小龍：香港傳奇》將於明年夏天上演，舞劇將芭蕾之美融入拳來腳往嘅動感，向香港一代武打巨星致敬，呈現李小龍啟發後世嘅武術與人生哲學。而今年冬季，港芭將會再次呈現由恒基地產冠名贊助嘅聖誕盛事《胡桃夾子》。

　　香港芭蕾舞團董事局主席何超鳳話，雙方嘅合作備忘錄簽署儀式將會喺10月8日舉行，呢一步象徵着港芭走過47年漫長歲月之後，終於迎來一個真正屬於自己嘅家，為藝術創作、演出、教育及社區參與帶來更多發展空間。西九文化區管理局行政總裁馮程淑儀就話，希望西九演藝和港芭可以强强聯手，為香港打造具香港特色、國際市場和國際競爭力嘅文化藝術IP。佢話，西九演藝中心現正作內部裝修，有信心明年年中開放大劇院。

　　明年開幕嘅西九演藝中心，設有1450座大劇院、600座中劇場、270座小劇場及展演廳，並有全港首個專為駐場藝術團體設立嘅舞蹈空間「Dance House」，總樓面面積逾4.2萬平方米。舞蹈空間總樓面面積為4846平方米，當中超過1千平方米將會係港芭舞團專屬空間，包括3間舞蹈及排練室、物理治療室、淋浴間及儲物設施，及專屬辦公室。

KellyChu