胡慧沖 - 泰國旅遊新節目 | 筆泰沖動

更新時間：02:00 2026-09-18 HKT
發佈時間：02:00 2026-09-18 HKT

　　新的電視節目下星期出街了，今次內容會有曼谷、芭堤雅、芭堤雅附近的邦盛和布吉島。雖然已經是接近10年的一個電視節目，而且已做了12輯，但幸好泰國不斷有新事物、新旅遊景點和配套，所以選擇內容並不艱難。

　　說實話自己真係好有表演欲，年輕時曾經拍過電影做過一些小角色，多年來都依然渴望有機會再拍電影甚至電視劇，但當然這絕對是個很難達成的願望，於是我就首次嘗試喺自己的節目裏面，用了短劇形式來介紹旅遊景點。頭六集有些內容會與香港女主持黃紫恩JoJo一齊，用唔同身分、唔同造型、唔同嘅故事去包裝一啲旅遊資訊，滿足自己的戲癮，希望大家都會睇得開心。其實這種手法早於1990年代我在亞視做《真係乜都有》嘅時候都已經用過，只不過嗰陣時我係幕後，而家係幕前自編自導自演。

　　今時今日睇泰國旅遊節目，資訊已經唔係行先，而係包裝同玩法，最緊要大家睇得開心！當然開心之餘，亦好希望可以帶畀大家正能量，又正如每一輯我嘅片尾歌，都會有一首勵志和有人生哲理的慢歌作結尾，今次都不例外，歌名叫《冲遊人生》，希望能透過自己一些人生體驗，帶給大家多點能量。自問旋律和歌詞也很不錯，只是唱得一般，但也希望大家喜歡！盡力做到娛樂與資訊並重，兼有正能量的一個旅遊節目。下個星期一晚開始連續三個星期播出，希望大家支持！

胡慧沖