KellyChu - 與學生打成一片分享絕殺抗壓心得 NBA球星「咖哩仔」相隔10年再來港獻技 | Executive日記

更新時間：02:00 2026-09-15 HKT
發佈時間：02:00 2026-09-15 HKT

NBA超級巨星史提芬居利（Stephen Curry）加盟中國體育用品品牌李寧後，雙方合作不斷。佢自今個月9號展開「中國行」，昨日行程來到香港，並現身屯門順德聯誼總會梁銶琚中學與師生近距離交流，校內校外都有大批粉絲舉起手機記錄呢位巨星嘅訪港身影，場面墟冚。主持人更教佢「咖喱」嘅廣東話，但被Curry講成「家姐」，引得大家哄堂大笑。

　　今次係Curry時隔十年再度訪港，身為4屆NBA總冠軍得主，佢不但親自落場同學生打成一片，更在交流環節大方分享個人心得。

　　有學生問及投射「絕殺球」嘅抗壓心得，Curry坦言，自己同大家一樣，面對巨大壓力時都會緊張，呢個時候會嘗試深呼吸去平靜神經。佢勉勵香港學生要將平日嘅刻苦訓練化為自信：「我會回想自己為了這一刻，在背後練習了多少次。你要學會接受失敗是比賽的一部分，但我從不退縮，因為我為這些時刻付出了極大努力。」

　　大家都知道Curry係一位出名嘅爆谷狂迷，有同學好直接問佢點先算係「完美的一碗爆谷」。呢個有趣提問令Curry笑逐顏開，佢自認係「傳統派」，對爆谷嘅要求相當有原則：「我不喜歡加太多花巧的配料，只需要上佳的牛油和鹽！最重要是夠熱、夠新鮮，咬下去還要有一點清脆的聲音。」更得意透露自己私底下有一份「爆谷排行榜」，專門為NBA各個球場嘅爆谷評分，惹來全場大笑。

　　談及今次走入屯門社區學校原因，Curry話小時候自己也是在屋企附近街場打波，那些平凡嘅球場，成為他與朋友建立友誼、建立社區歸屬感嘅重要地方，期望今次活動能為香港基層青少年提供更多接觸籃球機會。活動尾聲，Curry特意在該校校隊球衣上簽名留念，並與師生大合照，為探訪畫上完美句號。

KellyChu