KellyChu - 「二次開發」車站空間 麵包舖咖啡店便利店待客 港鐵「商店街」模式落戶成都 提升出行幸福感 | Executive日記
發佈時間：02:00 2026-09-09 HKT
成都同香港相隔千里，港鐵就以「商店街」經營模式為兩座城市建立聯繫，將喺香港嘅地鐵商店帶到成都，與成都地鐵「二次開發」當地嘅車站空間。Kelly到當地考察首批商店，見到設計好in嘅麵包舖、咖啡店、便利店等等，排列整齊，燈光通明，仲有港式商店嘅小簷篷，吸引乘客幫襯，返工前仲可以買杯咖啡提神；更有車站設置共享休憩區，令人們出行同旅遊體驗都大大提升！成都作為港鐵內地車站商業布局嘅戰略起點，目前已打造咗16個示範站，港鐵亦正喺鄭州、西安和廣州推行有關地鐵商店合作業務，為內地出行嘅市民獲得更多幸福感！
早於2020年，港鐵已經同成都軌道集團成立內地首間地鐵商業合資公司。港鐵中國內地業務總監黃琨暐話：「這座城市和市民對新事物的接受度很高，這為軌道商業創新提供了很好的土壤。」佢形容：「選擇成都，對我們而言是一次雙向奔赴。」
成都軌道集團副總經理孟林就話，今次合作「是一次典型的優勢互補」，港鐵擅長以商業支持軌道交通可持續發展，成軌就熟悉本地客流同空間資源。Kelly觀察到，神仙樹站商舖面向主要人流動線，一間烘焙店人氣十足，負責人仲話：「我們這個門店日均銷售1100單。」
由神仙樹站一路向北，Kelly嚟到中醫大‧省醫院站，步入站廳，就留意到呢個近600平方米嘅共享休憩空間，仲設有鮮花綠植自助選購店，帶嚟綠意，乘客可以坐低休息，或打機做功課，各適其適。成都軌道資源經營管理公司董事長張耘話，由於樞紐站具備客流優勢，休憩區啟用後，帶動毗鄰商業區整體效益提升四成。
成都地鐵現有18條線路，營運里程達758公里，位列全國第四，日均客流量約650萬人次。截至2026年，港鐵成功為成都16個車站、44間商舖進行「二次開發」，引入19個品牌，出租率達100%，二次開發嘅商舖平均租金比原有商舖提升三倍， 全線網累計進駐門店416間。
港鐵中國內地業務拓展及車站商務賈軍話，「要做好經驗複製推廣」，將成都試點嘅成熟做法快速輸出到其他城市，已經喺鄭州、西安成立合資公司，兩地首批示範商舖亦陸續開業，Kelly北上坐鐵路，就有「返屋企」嘅feel啦。
KellyChu
