國仁 - 音響發燒友的土地問題 | 退燒指南
發佈時間：02:00 2026-09-05 HKT
香港寸金尺土，「土地問題」向來是發燒友的死穴。想玩靚聲，但客廳無位擺幾座「神主牌」，太座又常常嫌阻埞。因此，近年音響界大吹「化繁為簡」風：既要靚聲、功能齊，又要抵玩兼外表靚仔。到底點樣才能砌出一套完美的蝸居系統？
第一步，先決出兩大陣營：「串流擴音機配被動喇叭」還是「串流前級配有源喇叭」？現時All-in-one擴音機多屬Class D，勝在機身細、發熱量低，夏天不用當暖爐，配搭喇叭選擇也多，但切忌自找麻煩去揀極難推的型號。
另一邊廂有源喇叭其實是Perfect Match，只要功率夠大、Headroom（餘裕）充足就很好聲；不過配搭串流前級時，要留意其輸出增益及音量控制，輸出增益最好不要低4V，而且數碼音量要有高過24 bit的處理，才不會劣化音質，這些規格在產品網頁會找到，記得要睇清楚才去馬。
另外，還有終極懶人包：連前級及訊源都內置的一對全功能「乜都有」有源喇叭，入手前就要𥄫實背板輸入選擇夠不夠，否則日後靈活性較低，想擴充升級唔使旨意。
講到訊源，打機睇戲聽歌缺一不可。All-in-one多數自帶專屬App，但想平靚正又懶得開App，揀支援Tidal Connect及Spotify Connect的機款就最順手。機背的數碼輸入亦不能少，駁電視、遊戲機或CD盤都極之實用。如果心思思想玩黑膠，部機就必須有模擬輸入，有些All-in-one內置埋唱頭放大器，方便到極點。
最後，蝸居玩音響千萬別忽視EQ和Room EQ（空間校正）功能。前者用來微調個人口味，後者則負責修正香港奇葩客廳的先天聲學缺憾；如果有跟機咪幫你量度實際環境，聲音就更準確，對於不想煩的All-in-one用家絕對是恩物。此外，記得留意系統的擴充空間，機身有Pre-out日後便可玩Bi-amp，有專屬超低音輸出更可隨時加Subwoofer升級2.1甚至2.2系統。若果能幫你做埋低頻管理，這套簡約系統就真的能陪你玩一段長時間。
國仁
