KellyChu - 本港首宗犬隻微創心臟手術 10歲松鼠狗翌日即可落地走 | Executive日記

更新時間：02:00 2026-08-19 HKT
發佈時間：02:00 2026-08-19 HKT

　　毛孩係唔少港人嘅心肝寶貝，過往犬隻心臟病只能靠長期藥物或開胸手術，主人心如刀割。新界動物醫療中心（WeHUG）日前成功完成全港首宗犬隻「經導管二尖瓣修復術」微創心臟手術，喺毋須停止心臟跳動及使用體外循環機嘅情況下，以微小切口修復瓣膜，救返一隻患有嚴重二尖瓣逆流嘅10歲松鼠狗「BB」，術後翌日就恢復走動，為主人帶嚟福音！

　　二尖瓣問題喺小型犬身上相對常見，例如貴婦狗、松鼠狗等，常見症狀包括咳嗽、呼吸急促等，就算休息，都常出現喘氣情況。「BB」去年8月確診B2期心臟病，今年5月惡化至C期，出現日夜咳嗽同肺積水。主人Iris憶述，當時面臨重大抉擇，最終決定「博一博」，手術成功當晚見到愛犬嗰一刻，忍唔住激動落淚。

　　WeHUG專業外科及神經科獸醫、獸醫部主管邱柏喻解釋，傳統「開心」手術對高齡犬隻風險極高，需要打藥令心臟停止跳動，仲要配合體外循環機，術後復原漫長；相比之下，TEER技術大幅減輕毛孩身體負擔。

　　另外，狗狗手術前必須經過經食道超聲波（TEE）等嚴格評估，如果發現犬隻瓣膜嚴重鈣化、變形，或逆流機制唔適合夾合，團隊就建議不宜手術。

KellyChu