陳山聰不做虎爸只有一堅持 6歲Jaco面對日做10樣功課這樣應對令爸爸放心

不少家長為子女學業絞盡腦汁，視帝陳山聰卻有不一樣的取態。他日前亮相梁靖琪（Toby）主持的YouTube節目《Tea Talk with Toby》，罕有談及與6歲兒子陳霆軒（Jaco）的相處點滴。原來這位爸爸最緊張的不是成績表上的名次，而是兒子能否寫好中文字、做個有禮有風度的男孩；他甚至曾因Jaco寫字馬虎，把兒子帶到鏡前認真訓話，場面既嚴厲又充滿父愛。

寫字草率觸發底線 拉兒子到鏡前訓話

陳山聰分享了自己對兒子最嚴厲的一次經歷。有次Jaco在家寫字非常草率，連自己的名字都寫不好，惹得陳山聰大發雷霆，更將他拉到鏡子前嚴肅訓話。他向兒子解釋爸爸的苦心：

阿仔，點解我要鬧你，因為你中國人，你一定要識寫中文字！……你將來想做個咩人？係由你自己決定，你想成功？想失敗？你就要努力囉！係靠你自己，爸爸只係support你，我點解要話你，點解想你啲字寫得靚，我唔想你俾人笑，如果其他同學仔寫得靚，得你一個寫得肉酸嘅，人哋笑你，你會唔開心，你寧願爸爸鬧你定寧願返學俾同學仔同老師笑？

陳山聰又向兒子解釋，雖然知道將來凡事都可以靠電話語音輸入，但連自己的名字都寫不好就「唔得」。Jaco頓時明白爸爸的用心，立刻坐好重新將字寫得端正。陳山聰亦倍感安慰，大讚兒子非常受教，轉數快且能迅速知錯能改：「一個6歲小朋友，佢係可以轉臉轉得好快嘅！……佢好快識得，好犀利！叻過我㗎！」

大讚Jaco獨立有風度 面對鏡頭毫不怯場

陳山聰大讚兒子性格非常獨立，而且充滿社交風度。他笑言平時會教導兒子許多禮儀規矩，而Jaco亦十分乖巧，不僅會主動照顧其他小朋友，懂得與同學分享，更是大方得體：「因為佢男仔，我希望佢識好多嘅規矩、禮貌……咁佢好gentleman嘅……佢真係好有風度嘅，係好好同埋好take care人嘅。」

提到Jaco面對大場面的表現，陳山聰坦言感到非常驚喜，指兒子完美遺傳了面對群眾的膽識，無論在台上演出或面對鏡頭都毫不怯場，甚至曾主動向父親提出想嘗試去「賣旗」籌款：「佢好獨立咯……6歲就獨立……佢係好淡定呀……（面對）鏡頭呀唔驚㗎……佢知道有觀眾就來了……佢知道係咩一回事嘅。」

陳山聰又透露，Jaco曾與阿佘（佘詩曼）拍廣告，他駕車送兒子去拍攝時，見到兒子埋位即自動波，大感驕傲：「呢樣嘢我好欣賞佢，我好proud of佢呢樣……佢埋位就嚟喎！同佢拍親嘢都under收工，佢真係好犀利！」他認為兒子自小接觸演藝圈中人，見慣世面，因此不怕醜，更有自己的talent。

堅拒盲目催谷 拒做「虎爸」

在競爭激烈的教育環境下，不少家長都會無所不用其極地催谷子女，但陳山聰明言自己絕對不是「虎爸」。他深知讀書無法強逼，因此從不要求Jaco名列前茅：

我唔會係逼佢讀書，因為一我唔係讀書嘅材料……我想你讀到書啦大佬，我自己讀唔到書，我想你讀到啦咁，但係冇得逼㗎，讀書係冇得（逼）……佢唔鍾意，你逼佢都冇用。

他只求兒子盡本份完成功課，不要「太過包尾」即可：「我又唔係要佢考第一，但係總之佢完成就OK嘅，唔好太過包尾㗎嘛。」比起學業成績，陳山聰更重視兒子的品德。談到對兒子的期望，他直言：「冇，總之唔係變壞就得喇！佢做咩工作都冇所謂，咁當然望子成才就梗㗎啦！每個父母都想，但係咪真係成到才就睇佢自己，我淨係負責support佢囉！」

Jaco讀傳統學校每日10樣功課 

節目中，陳山聰提到Jaco讀傳統學校，每日有10樣功課，自己光是想像也覺得辛苦。陳山聰卻笑言，兒子比他想像中堅強：

我問佢，有十樣功課好多喎，Jaco係咁樣答我：『都唔係咁多啫！OK吖！』咁我就放心喇！佢肯咁講，起碼佢會話俾我聽先……我見到佢都享受校園生活嘅，enjoy嘅！

陳山聰又透露Jaco的日常時間表非常緊湊：早上7時15分坐校車，下午4時30分才返到家，沖涼、食少少嘢後做功課，等補習老師來，搞到7、8時，之後讓他玩半個鐘，9時或9時半就寢。他感慨現時小學開支繁多，「而家啱啱開始咋，到佢五、六年班有同學要出去，好多嘢㗎！」

計劃暑假送兒子到溫哥華 冀擴闊眼界

陳山聰表示，會視乎Jaco的性格來決定是否讓他繼續在傳統學校升學：「我覺得Jaco係可以handle到應付到，咁咪試囉！唔得先轉囉，冇咩所謂。」他又計劃明年暑假送兒子到溫哥華讀summer school，接觸不同的小朋友，擴闊眼界：「等佢見到更多嘅嘢，等佢自己思考吓！」

談兒子改變人生 陳山聰：除咗佢，冇嘢係屬於我

談到Jaco如何改變自己的人生，陳山聰感觸良多。他憶述兒子出世一刻的激動心情，坦言從沒想過四十幾歲才做爸爸，但這個「意外」是上天賜給他和家庭的禮物：

呢個世界除咗佢，冇嘢係屬於我，除咗佢，佢流緊我嘅血呀，佢出世嗰刻我已經係咁諗……你知我忍唔到，我講起佢，講起我daddy會係咁，wow！原來係咁amazing嘅一件事嚟嘅。

陳山聰又笑言，隨着兒子長大，雖然不再時時刻刻都覺得「amazing」，反而覺得「好多嘢呀！好煩呀！」但仍然非常享受：「但係enjoy嘅，開心嘅……」他強調，現時的努力都是為了兒子的將來：「我陪到佢，我一定陪佢，而家嘅努力都係為咗佢嘅將來。」

寄語兒子：唔需要比較

陳山聰又在節目中分享自己的育兒哲學，認為現今世代不一定要讀書讀得非常好才有出路，最重要是發掘潛能，亦不需要與人比較：

我都會同Jaco講嘅，唔需要比較，我唔要你好勁，總之你正正常常。

他寄語兒子將來想做什麼工作都可以，爸爸只會負責support，條路要由兒子自己行。