配套一流近港鐵站!公屋派這「神級舊邨」算中頭獎?網民驚揭清明重陽有這「缺點」|Juicy叮
發佈時間:16:00 2026-11-18 HKT
有網民在Facebook發帖分享喜訊,指自己終於在「第三次配房」迎來畢業,樓主隨帖文上載了房署的配房通知信,顯示其獲派位於柴灣的公屋環翠邨富翠樓。帖文引來大批街坊與網民湧入恭喜,不少人直呼樓主「中咗頭獎」、「得天下啦」,不過卻有網民卻認為該屋邨有一些「缺點」,掀起討論。
支持派:港島配套、交通「正到顛」
樓主難掩興奮之情,在帖文中寫道:「3派,收樓啦!派到合適理想的地方,心情無法會形容......有無係呢層樓街坊或者又是剛剛拿到呢層樓的朋友仔?多謝呢個群組朋友仔」。
大批柴灣街坊及港島支持者力撐環翠邨,認為該處不論交通、生活配套還是民風,都比大西北的新落成屋邨好得多。有網民指出柴灣的交通優勢:「環翠就係正到顛,8P尾二站,十分鐘到銅鑼灣」,「港鐵由柴灣站搭去銅鑼灣站約20分鍾,金鍾站約25分鍾,就係因為係頭站,所以普通時間,多數有位坐」。
除了上班方便,生活配套更是無得輸,有網民細數柴灣的日常生活細節:
「好住,地鐵,巴士,醫院,學校,樣樣都有,街市都有幾個,菜又新鮮又平,戲院門票都平......我有同事派新樓,但每日買餸都要搭巴士30分鐘先去買到菜,所以環翠邨生活不錯」。
有街坊又大讚柴灣區民風純樸:「你係港島區搭車真係會發覺呢邊啲人係比較正常斯文有禮貌,唔似啲新市鎮新屋村龍蛇混雜,搭個車日日都戰狼上身隨時準備打交咁」。
反對派掀爭議:又遠又舊、配套差「有排你受」
不過,在一片恭喜聲中,卻有網民唱反調,直指環翠邨又舊又遠,環境一般,有反對派網民直言:「又遠又舊都中頭奬」,「尾站去邊都遠,旺角又遠機場又遠大陸又遠,冇地方近。中要50年樓,壞𨋢、冇廁所水、環境又差,有排你受。仲衰過住東涌,起碼近機場,放假飛走方便死,環境又好又新。」「起碼屯元天近大陸同新,空氣又好d,點都好過柴灣又舊,去邊都又最遠果個位。」
此番質疑言論即引來其他網民猛烈開火還擊:「你都傻傻哋嘅,118去旺角30分鐘就已經到站!咁鍾意返大陸嘅,返大陸住就唔好住香港!壞𨋢冇廁所水?有邊個大廈唔會壞𨋢唔會冇廁所水?」「要咁比,好難比......不如去大陸住,唔駛等咁耐排公屋添!」
街坊提樓主要適應一點:清明重陽,柴灣會交通好塞
有網民即貼心地為樓主打預防針,提醒環翠邨唯一需要適應的地方:「環翠邨環境都唔錯,但係你要有心理準備,可能見到墳場。我都係柴灣大,唔覺得見到墳場有問題,不過你預清明重陽,柴灣會交通好塞......」
網民:上樓最緊要知足
雖然雙方就「返大陸方便」還是「過海返工方便」爭持不下,但有網民隨即指出,近年港島去內地其實已經大有改善:「港島區依家又有B13直去新皇崗口岸,特快果班車係環翠上車1個鐘零20分鐘就到口岸,係車訓完個靚覺就直接去到內地玩......好過大西北日日迫車過海返工,仲辛苦」。
有網民勸喻大家不用過分爭拗,最重要是樓主自己住得開心:「而家抽公屋唔係買樓,人哋收樓嗰個心滿意足就得。」對於網民的熱烈討論,樓主亦大方互動,當被問到此前有沒有被派過柴灣時,樓主簡短回應「沒有」,看來這次「三派」獲配港島,對樓主而言確實是得償所願。
來源:公屋討論區 - 香港facebook群組
延伸閱讀:獲派馬鞍山公屋開門驚見「這幕」!打聽前住戶身份嚇退 網民:未搬入去已隔空中招?

















