公屋「盲盒」連中兩次東涌點算？網民爆11月隱藏新樓 更近地鐵站：三派博得過｜Juicy叮
發佈時間：16:00 2026-11-09 HKT
有準公屋住戶在Facebook群組發文，指自己「連續兩派都係東涌，點算.........」，短短十字的求救訊號，引爆網民熱議。
派樓如開盲盒？過來人揭「東涌連環派命運」
面對樓主連中兩元東涌的困局，不少網民形容現時的派樓機制「依家好似開盲盒加賭徒心態咁」。事實上，在「擴展市區」的選項下，東涌近年有大量新落成屋邨，有網民理性分析指「你選擴展區唔係東涌想去邊，而家得東涌有新樓，舊樓有其他地區，但無人走就無機會有你份」，更有網民估計「東湧近期是新落成大型屋村，電腦6成會東湧」。
留言區亦湧現大批同病相憐的「東涌連環派」案例，有網民留言感嘆「我都擔心緊，剛拒絕雋東一派」，隨即引來同路人和應「我也是吖，一派拒絕了雋東」；亦有人分享朋友的經歷，指「一派雋東邨，二派迎東」，甚至有網民搞笑預測接下來的命運：「三派滿東？」、「翔東」，被其他網民笑言「滿東咁毒」。雋東邨、迎東邨、滿東邨和翔東邨均是位於東涌的公屋。
更誇張的是，有網民分享「一派滿東 二派雋東 三派梨木樹兇宅，四派大窩口」的曲折經歷，亦有網民直言「我朋友3次派同一個地方，冇得唔要啦」。
網民料本月可能派葵青「菁翠樓」新樓
不過，正所謂有危有機，不少「主戰派」力勸樓主「一定博啦。隨時住幾十年。一定派到自己啱為止啦，梗係」、「唔差在 1派新樓都冇左，博埋去」，更有網民放出消息指「唔好要，等三派。嚟緊11月有機會派葵芳地鐵站葵翠邨二期新樓。時間上好接近樓主。資料顯示，「葵翠邨二期」是位於葵涌新葵街的全新公營房屋發展項目，房委會已將其正式命名為「菁翠樓」，預計於2027年第一季竣工。
有成功「逆天改命」的網民亦現身說法，指自己「一派東涌，二派轉市區派順利邨，終極一派元州邨，畢業」，隨即獲其他人羨慕大讚「元州邨間就係筍盤，恨『史』隔離，2步地鐵站，3步巴士站，4步長沙灣戲院，5步李鄭屋街市」。不過，博三派亦非毫無風險，不少清醒的網民警告「最後一派一定舊樓」、「3派象山村，或者井字型」，甚至有網民幽默恐嚇：「放心，三派大澳！」
東涌真係生人勿近？街坊激辯：風景如畫 VS 車費物價貴到喊
究竟東涌是否真的如此不堪？網民對此評價兩極，反對派指出生活成本問題，直言「物價貴, 車費貴出行太浪費時間」，獲街坊和議「認同你講法，東涌物價同車費都一定貴」。
另一邊廂，支持入主東涌的網民則認為「東涌有冇咁差？起碼都係新樓啊」、「東涌正，人潔地靈 風景如畫」，更有街坊從地理優勢出發，笑言住東涌「去機場揾工方便」兼且「過大海近......」。有基建迷亦補充指未來發展潛力大：「有好有唔好。嚟緊東涌東站開幕。行5至8分鐘到地鐵站。政府仲要特登起條右蓋嘅行人天橋連接地鐵站。」
有當年主動調遷入東涌的街坊更分享真實居住體驗，寫道：「我當年荔景申請調遷搬大D揀入東涌，真心比屯天元好,除外交通時間耐左，住係好住嘅,放假你會選擇留响屋企多左，因為假期你絕對唔會想出東薈城，太多自田含同行山客,仲迫過旺角/廣東道」，道盡了東涌居民周末的另類無奈。
網民狠批「嫌三嫌四」倡收八萬手續費
除了實用的揀樓攻略，這篇帖文亦觸動了不少網民對公屋福利制度的神經，有網民留言直斥「我覺得政府應該取消可以揀樓，派福利仲要喺度嫌三嫌四，硬掘先至係正常做法」。
其中一名網民更發表長篇激進言論，火力全開砲轟揀樓心態：「根本就唔應該有揀樓呢個option，新樓嫌遠，低層又驚蛇蟲鼠蟻，又要就埋自己返工返學，......一係就取消揀樓option，一係就如果每次拒絕就要支付七至八萬嘅拒絕手續費，可以分兩三年，喺每月租金度扣，等呢班X頭知道要揀擇就要付出代價要有後果！！！」
這番言論隨即引來另一名網民以「高級黑」的反諷方式還擊，留言道：「咁我大膽少少，不如取消整個公屋政策，全部收返俾同區私樓租價錢。......長者全部優惠取消，生果金樂悠咭嗰啲。綜援全部取消。12年免費教育全部取消。所有公共交通工具小童長者優惠價全部取消。......」有網民索性拋出一句終極解決方案：「去買樓」，為這場公屋派樓生死決畫上充滿港式幽默的句號。
來源：公屋討論區 - 香港facebook群組
延伸閱讀：輪候15年獲派東涌全新公屋24樓 網民列隱藏優缺點：捱3年就發達
